नेकपा माओवादी केन्द्रका अध्यक्ष पुष्पकमल दाहालले अहिलेको गठबन्धन परिवर्तन रक्षाधर र परिवर्तन उल्ट्याउने शक्तिबीचको लडाइँ रहेको बताएका छन् । त्यसको अन्तिम फैसला मंसिर ४ गतेको निर्वाचनले गर्ने उनले बताए । अहिलेको गठबन्धन निर्वाचन जित्नको लागि बनाएको नभई राष्ट्र, लोकतन्त्र र गणतन्त्रको रक्षाको लागि भएको भन्दै ढुक्कसँग गठबन्धनका उम्मेदवारलाई जिताउन आग्रह गरे । 

सत्ता गठबन्धनको प्रशिक्षण भेलालाई बुटवलमा सम्बोधन गर्दै प्रचण्डले एक–अर्कालाई मद्धत गर्दै धेरै मेहनतले गठबन्धन बनेको बताए । उनले गठबन्धनको काँधमा संविधानको रक्षा गर्दै आर्थिक समृद्धिको मिसनसहित देशलाई आर्थिक विकासतर्फ लैजाने जिम्मेवारी भएको बताए । 

अहिलेको गठबन्धन वैज्ञानिक धरातलबाटै बनेको प्रचण्डले बताए । उनले एमालेप्रति लक्षित गर्दै भने, ‘प्रतिगमन र प्रतिक्रान्तितिर जाने कम्युनिष्ट खोल ओढेका भन्दा नेपाली कांग्रेस हजारौँ गुणा लोकतन्त्रवादी छ । गठबन्धन महान उद्देश्यको लागि बनाइएको हो । हामी एक छौँ । ऐक्यबद्धताको लागि आएका हौँ ।’