मोरङको निर्वाचन क्षेत्र नम्बर–६ बाट प्रतिनिधिसभा सदस्यको उम्मेदवार रहेका नेपाली कांग्रेसका नेता डा. शेखर कोइरालाले चुनावी प्रचारको लागि घर दैलो कार्यक्रम शुरू गरेका छन् । 

चुनाव प्रचारको क्रममा आइबार विहान विराटनगर–११ मा कोइरालाले मतदातासँग भेटघाटा र चुनावी सभालाई सम्बोधन गरेका छन् । भेटघाटका क्रममा मतदाताले आफूले लामो समयदेखि नागरिकता नपाएको, नागरिकता विधेयक अलपत्र पारिएको लगायतको गुनासो गरेका थिए । 

कोइरालाले सर्वसाधारणलाई जवाफ दिदै राष्ट्रपतिले संविधान नमान्दा नागरिकता विधेयक अलपत्र परेको बताए । 

चुनावी सभालाई सम्बोधन गर्दै उनले संसदबाट २ पटक पास गरेर पठाएको नागरिकता विद्येक पास नगरेर राष्ट्रपतिले संविधान उल्लंघन गरेको आरोप लगाए ।

मंसिर ४ को चुनावपछि बन्ने गठबन्धन सरकारले नै नागरिकता सम्बन्धी समस्या समाधान गर्ने उनको दावी  । कोइरालाले भने, ‘मैले जिते भने सदनमा पुगेर नागरिकता विद्येक पास गराउन सहयोग गर्छु ।’

विराटनगर–११ का स्थानीयले नागरिकता बनाउन नपाउँदा उमेर पुगेका सर्वसाधारणले राज्यबाट पाउने सेवा सुविधा लिन नपाएको गुनासो गरेका थिए ।  

डा. कोईरालाले बस्तीलाई डुवान मुक्त गर्न सिंघिया खोलाको तटबन्धनको व्यवस्था गर्ने प्रतिवद्धता जनाएका छन् । ‘दुहवीदेखि रानीसम्म सिंहिया खोलाको तटबन्धन गर्नेछौं । त्यसका लागि डिपिआर भइसकेको छ । बजेट परिसकेको छ । अब ठेक्का लाग्न मात्रै बाँकी हो ।’