कमल थापाको क्षेत्रमा राजेन्द्र लिङ्देनको चुनावी सभा

राष्ट्रिय प्रजातन्त्र पार्टी (राप्रपा) का केन्द्रीय अध्यक्ष राजेन्द्र लिङ्देन बिहीवार मकवानपुर आउने भएका छन् । 

बिहीवार दिउँसो मकवानपुरको बकैया गाउँपालिका–४ जुरेली फूटबल मैदानमा पार्टीले आयोजना गरेको आमसभामा सहभागी हुन अध्यक्ष लिङ्देन मकवानपुर आउन लागेका राप्रपा मकवानपुरका नगर अध्यक्ष अरुण लामाले जानकारी दिए ।  

सभालाई मनिषा कोइराला, राप्रपाका केन्द्रीय सदस्य एवं मकवानपुर प्रतिनिधिसभा क्षेत्र नम्बर १ का उम्मेदवार दीपकबहादुर सिंह, बागमती प्रदेश सचिव एवं मकवानपुर क्षेत्र नम्बर १(२) प्रदेशसभा उम्मेदवार गुञ्जनबहादुर न्यौपाने, मकवानपुर क्षेत्र नम्बर १(१) प्रदेश सभाका उम्मेदवार सागर थापा लगायतले सम्बोधन गर्ने कार्यक्रम रहेको राप्रपा मकवानपुरले जनाएको छ । 

२ वटा निर्वाचन क्षेत्र रहेको मकवानपुरमा क्षेत्र नम्बर १ तर्फ हेटौंडा उपमहानगरपालिकाका १५ वडासहित बागमती गाउँपालिका, बकैया गाउँपालिका र मकवानपुरगढी गाउँपालिकाका १, २, ३ र ४ नम्बर वडा पर्छन् । सो क्षेत्रको प्रतिनिधिसभा सदस्यका लागि सत्तारुढ गठबन्धनको तर्फबाट नेपाली कांग्रेसकी सहमहामन्त्री महालक्ष्मी उपाध्यय (डीना), नेकपा एमाले र राप्रपा नेपालका साझा उम्मेदवारको रूपमा कमल थापा पनि  निर्वाचनको प्रतिस्पर्धामा छन् ।