निर्वाचनले नेपाल कता जाने भन्ने कुराको फैसला गर्नेछ : प्रधानमन्त्री देउवा

प्रधानमन्त्री एवं नेपाली कांग्रेसका सभापति शेरबहादुर देउवाले आगामी मंसिर ४ गते हुन लागेको प्रतिनिधिसभा र प्रदेशसभा सदस्यको निर्वाचनले नेपाल कता जाने भन्ने कुराको फैसला गर्ने बताएका छन् ।

वाम लोकतान्त्रिक गठबन्धन काठमाडौंको १० नम्बर निर्वाचन क्षेत्रले आयोजना गरेको चुनावी सभालाई सम्बोधन गर्दै उनले ठूलो संघर्षपछि प्राप्त भएको संविधानको रक्षा गर्नु आजको आवश्यकता भएको बताए ।

प्रधानमन्त्री देउवाले भने, ‘यो राष्ट्रले धेरै ठूलो लडाइँपछि संविधान पाएको छ । पद्धति पाएको छ । संविधानले नै ३३ प्रतिशत महिलाको सहभागिता सुनिश्चित गरेको छ । आदिवासी, जनजाति सबैलाई  हक दिएको छ । यो समावेशी संविधान मात्रै नभई सबै समावेशी लोकतन्त्र पनि छ ।’

सबै वर्ग तथा क्षेत्र अटाउने संविधानलाई बचाउने लक्ष्यका साथ गठबन्धन बनेको उनको भनाइ छ । प्रधानमन्त्री देउवाले भने, ‘हाम्रोमा स्थापित भएको समावेशी प्रजातन्त्र र राजनीतिलाई बचाई राख्नुछ । नेपाली जनताले निर्वाचनमार्फत सरकार बनाउन पाउने, बदल्न पाउने अधिकार पाएका छन् । यो महत्त्वपूर्ण छ । यसलाई स्थायी राख्न पनि हामी एक ठाउँमा उभिएका छौं ।’

प्रधानमन्त्री देउवाले जथाभावी तरिकाले नेकपा एमालेका अध्यक्ष केपी शर्मा ओलीले २–२ पटक संसद् भंग गरेपछि आफूहरूले मिलेर त्यसलाई बचाएको दृष्टान्त पेश गरे ।

प्रधानमन्त्री देउवाले भने, ‘२ पटक संसद् भंग गर्न थालेपछि हामीले प्रजातन्त्र बचाएका हौं । लोकतन्त्र र समावेशी प्रजातन्त्र बचाएका हौं । यसलाई स्थायी बनाउन गठबन्धन बनेको छ ।’

गठबन्धनको एउटै शर्त स्थायी लोकतन्त्रलाई समृद्ध पार्नु रहेको उल्लेख गर्दै उनले जनताले पाएको अधिकार कमजोर गर्न नसकोस् र हटाउन नसकोस् भनेर गठबन्धन बनेको उल्लेख गरे । उनले गठबन्धन आगामी १० देखि १५ वर्षसम्म जाने विश्वास व्यक्त गरेका छन् ।

स्थायी शान्ति र लोकतन्त्रको सम्वद्र्धनका लागि गठबन्धन अपिरहार्य रहेको प्रधानमन्त्री देउवाको भनाइ छ । उनले सडक विस्तारका क्रममा समस्यामा परेका स्थानीयलाई मुआब्जा दिने विश्वास दिलाएका छन् ।

‘कसैको पनि सम्पत्ति विना मुआब्जा भत्काउन पाइँदैन । भत्काउन त पाइन्छ तर मुआब्जा दिएपछि मात्रै,’ प्रधानमन्त्री देउवाले भने, ‘अब मुआब्जा दिलाउने काम उहाँ (सो क्षेत्रका प्रतिनिधिसभा सदस्यका उम्मेदवार राजन केसी) को हो ।’