विश्वकप फुटबल अन्तरगत शुक्रबारदेखि क्वार्टर फाइनलका खेल सुरु हुँदैछन् । राति पौने ९ बजे ब्राजिल र क्रोएसियाबीच प्रतिस्पर्धा हुँदैछ । नकआउट चरणमा ब्राजिल दक्षिण कोरियालाई ४–१ गोल अन्तरले हराउँदै क्वार्टरफाइनलमा प्रवेश गरेको थियो । यस्तै क्रोएसियाले जापानलाई पेनाल्टी सुटआउटमा हराउँदै अघिल्लो यात्रा तय गरेको थियो । 

क्रोएसिया साविक उपविजेता हो । ब्राजिल भने कीर्तिमानी छैटौं पटक उपाधि जित्ने योजनामा छ । लुका मोड्रिडकाले क्रोएसियाको कप्तानी गर्ने छन् भने थिअगो सिल्भाले ब्राजिलको कप्तानी सम्हाल्नेछन् । 

यसैगरी अर्जेन्टिना र नेदरल्याड्सबीचको खेल राति पौने १ बजेदेखि सुरु हुनेछ । अर्जेन्टिनाले अस्ट्रेलियालाई २–१ र नेदरल्याड्सले अमेरिकालाई ३–१ ले पराजित गर्दै क्वार्टफाइनलमा एकअर्कालाई प्रतिद्वन्द्वी पाएका हुन् । 

दुई टोलीबीच पछिल्लो भेट सन् २०१४ को सेमिफाइनलमा भएको थियो । निर्धारित र अतिरिक्त समयमा  बराबरी भएपछि खेल पेनाल्टी सुटआउटमा गएको थियो । जहाँ अर्जेन्टिना विजयी भएको थियो । 

सोहि हारको बदला लिने लुइस भान गाल प्रशिक्षणमा रहेको नेदरल्यान्ड्सको योजना छ ।  यस्तै मेस्सी नेतृत्वको अर्जेन्टिना पनि नेदरल्याण्ड्सलाई पाखा लगाउँदै उपाधिको होडमा अघि बढ्ने योजनामा छ ।