नेपाल वायुसेवा निगमको क्याबिन क्रुको आन्दोलनका कारण निगमको २ वटा अन्तर्राष्ट्रिय उडान रोकिएको छ । क्याविन क्रुलाई वायुसेवा निगम व्यवस्थापनले नवीकरण नगरिदिएको विरोधमा उडान नै प्रभावित भएको हो । निगमको बिहीवार बिहान ७ बजे हुनुपर्ने रियादको र दिउँसो २ बजेको दिल्ली उडान क्याबिन क्रुको आन्दोलनकै कारण रोकिएको छ । 

निगमको उडान रोकिँदा यात्रुले सास्ती पाएका छन् । निगमको उडानमार्फत अन्तर्राष्ट्रिय उडानमा जानुपर्ने जहाज नउडेपछि बिहान र दिउँसो २ वटा उडानका लागि विमानस्थल पुगेका यात्रु अलपत्र परेका छन् । 

निगमका प्रवक्ता अर्चना खड्काका अनुसार क्याबिन क्रुको आन्दोलनका कारण उडान हुन सकेको छैन । अहिले निगमको केन्द्रीय कार्यालयमा व्यवस्थापन र नेपाल वायुसेवा क्याबिन क्रु संघबीच वार्ता भइरहेको छ । वार्तालाई सकारात्मक बनाएर उडान गराउने प्रयास भइरहेको खड्काले बताइन् । उनका अनुसार बिहीवार राति १० बजे क्वालालम्पुर र साढे ११ बजे दोहाको उडान तालिका रहेको छ ।

बिहानदेखि निगमको उडान नै नभएका कारण यात्रुलाई सास्ती पाएकोले छिटोभन्दा छिटो उडान गराउन आफूहरू प्रयासरत रहेको निगमको भनाइ छ । 

निगमले १५ वर्षदेखि उडान गरिहेका दुई जना क्याबिन क्रुको नवीकरण नगरिदिएको आरोप आन्दोलित कर्मचारीको छ । करार अवधि सकिएको तीन महिनासम्म पनि नवीकरण नगराई उडानमा लगाइरहेको र व्यवस्थापननिकट कर्मचारीको भने आकर्षक सेवा सुविधासहित नवीकरण गराएको भन्दै संघले बिरोध गरेको हो ।

क्याबिन क्रुलाई मासिक १०० घण्टासम्म मात्रै उडानमा लगाउन पाइने नियमविपरीत धेरै समय खटाएको, करार नवीकरण नभएका र बिरामी परेका क्याबिन क्रुका कारण उडान गर्न नसक्दा निगमको उडानै प्रभावित हुन पुगेको वायुसेवा निगम क्याबिन क्रु संघले जारी गरेको विज्ञप्तिमा उल्लेख छ ।