कात्तिकको ११ गतेदेखि प्रदर्शनमा आएको ‘महापुरुष’पछि कुनै नेपाली फिल्मले हलसम्म दर्शक तान्न सकिरहेका छैनन् । झन्डै दुई महिनादेखि नेपाली फिल्ममा दर्शकको खडेरी व्यहोरी रहेका हल सञ्चालकहरु ‘डिसेम्बर फल्स’लाई लिएर भने आशावादी छन् । 

आर्यन सिग्देल र उपासना सिंह ठकुरी अभिनीत फिल्म ‘डिसेम्बर फल्स’ यही पुस १५ गतेदेखि प्रदर्शनमा आउँदैछ । 

पोस्टरदेखि नै दर्शकको ध्यान तान्न सफल ‘डिसेम्बर फल्स’को टिजर, गीत र ट्रेलरलाई समेत दर्शकहरुले रुचाएका छन् ।

केही दिनअघि सार्वजनिक ट्रेलरलाई लिएर दर्शकहरुले एकदमै सकारात्मक प्रतिक्रियाहरू दिइरहेका छन् । मंगलबार बिहानसम्म ३ लाख ३० हजार बढी भ्युज पाएको ट्रेलरलाई दर्शकहरुले ‘उत्कृष्ट’ भनेका छन् । कतिपय दर्शकहरुले उपासनाको सुन्दरतासँगै अभिनयको वर्णन गरेका छन् । ​कतिपयले आर्यनको अभिनय एवं एक्सनको तारिफ गरेका छन् । फिल्म हेर्न एकदमै आतूर रहेको प्रतिक्रिया समेत थुप्रै दर्शकले दिएका छन् ।

जे होस् फिल्मले प्रचार सामाग्रीहरुमा सुरुदेखि नै एकदमै राम्रो प्रतिक्रिया पाइरहेको छ । दर्शक प्रतिक्रियाबाट निर्माण टिम समेत आशावादी देखिएको छ ।

फिल्मले दर्शकको राम्रो साथ पाउने अपेक्षा निर्माण टिममा छ । आर्यन र उपासनासहित कलाकारहरू समेत फिल्मलाई लिएर एकदमै आशावादी छन् । लभस्टोरी र एक्सन जनरामा निर्माण भएको फिल्मलाई प्रविण झाले निर्देशन गरेका हुन् ।

फिल्ममा आर्यन र उपासनाका साथमा सलोन बस्नेत, शिवहरी पौड्याल, नागेन्द्र रिजाल, नरेश भट्टराई लगायतको पनि अभिनय छ । विपिका खनालको कथा, केदार भुसाल र प्रतिक पौडेलको पटकथा एवं संवाद रहेको फिल्ममा रामप्रसाद रिजाल प्रस्तुतकर्ता एवं निर्माता छन् । राज कुमार भट्ट पनि निर्माता रहेको फिल्ममा लक्ष्मण रिजाल र असिम काफ्ले कार्यकारी निर्माता छन् ।

आर्यन र उपासनाले ‘डिसेम्बर फल्स’मार्फत फिल्ममा पहिलोपटक सहकार्य गरेका हुन् । अहिलेकी चर्चित अभिनेत्री र एक समयका नम्बर वान अभिनेताको सहकार्यलाई लिएर समेत चासोका रुपमा हेरिएको छ ।