नेकपा एमालेको संसदीय दलको नेतामा पार्टी अध्यक्ष केपी शर्मा ओली सर्वसम्मत चयन भएका छन् । कमलादीस्थित प्रज्ञा भवनमा बसेको संसदीय दलको बैठले ओलीलाई संसदीय दलको नेतामा चयन गर्ने निर्णय गरेको सांसद एवं एमाले नेता ठाकुर गैरेले जानकारी दिए । 

एमालेबाट निर्वाचित सांसदहरूलाई बधाई तथा शुभकामना दिन प्रज्ञा भवनमा विशेष समारोह आयोजना गरिएको छ । उक्त कार्यक्रम सकिएलगत्तै संसदीय दलको बैठक बसेको गैरेले बताए । 

बैठकमा उपाध्यक्ष विष्णु पौडेलको प्रस्ताव र अर्का उपाध्यक्ष सुवास नेम्वाङको समर्थनमा ओलीलाई संसदीय दलको नेता चयन गरिएको गैरेले बताए । 

संसदीय दलको उपनेता र प्रमुख सचेतक भने अन्य बैठकबाट चयन गरिने एमालेका नेताहरूले बताएका छन् ।