अख्तियार दुरुपयोग अनुसन्धान आयोगले सामाजिक सुरक्षा भत्ता वितरणमा अनियमितता गरेको आरोपमा तीनजना वडा सचिवविरुद्ध भ्रष्टाचार मुद्दा दर्ता गरेको छ । 

सामाजिक सुरक्षा भत्ता वितरण गर्ने क्रममा अनियमितता गरेका तीन सचिवविरुद्ध अख्तियारले विशेष अदालतमा मुद्दा दर्ता गरेको छ । अख्तियारले खोटाङको दिक्तेल रुपाकोट मझुवागढी नगरपालिका ४ का तत्कालीन वडा सचिवहरू मोहनप्रसाद आचार्य, जानुका श्रेष्ठ र पवन श्रेष्ठविरुद्ध भ्रष्टाचार मुद्दा दर्ता गरेको हो ।

आचार्यले आर्थिक वर्ष २०७४/०७५ को पहिलो चौमासिक किस्ता वितरण गर्दा ९ जनाको नाममा ५५ हजार २०० रुपैयाँ हिनामिना गरेको अख्तियारको दाबी छ । 

त्यस्तै, तत्कालीन वडा सचिव जानुका श्रेष्ठले आर्थिक वर्ष २०७४/०७५ को दोस्रो किस्तादेखि आर्थिक वर्ष २०७५/०७६ को दोस्रो किस्तासम्म उक्त वडामा सामाजिक सुरक्षा भत्ता वितरणमा ३० जनाको नाममा सामाजिक सुरक्षा भत्ता रकम निकासा गरी/गराई लाभग्राही नै नहुँदासमेत नाम देखाई १ लाख ७७ हजार ६०० रुपैयाँ भ्रष्टाचार गरेको अख्तियारको दाबी छ ।

त्यस्तै, तत्कालीन वडा सचिव पवन श्रेष्ठले आर्थिक वर्ष २०७५/०७६ को तेस्रो किस्तामा उक्त वडामा सामाजिक सुरक्षा भत्ता वितरण गर्दा ७ जनाको नाममा सामाजिक सुरक्षा भत्ता रकम निकासा गरी ३५ हजार २०० रुपैयाँ हिनामिना गरेको अख्तियारको दाबी छ । 

उनीहरूविरुद्ध सोही रकम बराबरको बिगो र जरिबानाको माग दाबी लिई मुद्दा दर्ता गरिएको अख्तियारका प्रवक्ता श्यामप्रसाद भण्डारीले जानकारी दिए ।