राहदानी र लाइसेन्सको लाइन सल्टाउन गृहमन्त्री रविको विशेष एक्सन

सिंहदरबारस्थित प्रधानमन्त्री तथा मन्त्रिपरिषद्को कार्यालयमा पदभार गर्दै प्रधानमन्त्री पुष्पकमल दाहाल ‘प्रचण्ड’ले सुशासन, सेवाप्रवाह र विकास निर्माणका काममा प्रभावकारिता अभिवृद्धि गर्न प्रधानमन्त्री तथा मन्त्रिपरिषद् कार्यालयको सुदृढीकरण सम्बन्धी निर्णय गरेका थिए ।

मन्त्रिपरिषद्को निर्णय नम्बर ४ मा ‘नागरिकहरूलाई प्रदान गर्दै आएका आधारभूत सेवा विशेषगरी राष्ट्रिय परिचयपत्र, विद्युतीय राहदानी, सवारी चालक अनुमतिपत्र लगायत सेवा प्रवाह सुगम, सरल, कम खर्चिलो र झन्झटमुक्त बनाउने । यसमा देखिने गरी सुधारका कामहरू तत्काल आरम्भ गर्ने र कार्यान्वयन गर्ने’ भनेर निर्णय गरेको थियो । 

उपप्रधान तथा गृहमन्त्री रवि लामिछानेले त्यस विषयमा मन्त्रिपरिषद्मा प्रस्ताव राखेका थिए । उनी बुधवार त्रिपुरेश्वरमा रहेको राहदानी विभाग निरीक्षण गर्न समेत गएका छन् ।

गृह मन्त्रालयका प्रवक्ता फणिन्द्रमणि पोखरेलका अनुसार राहदानी विभाग र यातायात कार्यालयमा लाइन नबस्ने गरी सेवा प्रवाह कसरी गर्न सकिन्छ भनेर टेक्निकल टीमलाई अनुसन्धान गर्न खटाइएको बताए ।

‘समस्याको समाधान कसरी गर्न सकिन्छ भनेर मन्त्रीज्यूले एउटा टेक्निकल टीम खटाउनुभएको छ, उनीहरूले समस्याहरू केलाएर ल्याएपछि कसरी समाधान गर्न सकिन्छ त्यसअनुसार कदम चाल्छौं,’ प्रवक्ता पोखरेलले लोकान्तरसँग भने ।

मन्त्री लामिछानेले कार्यभार सम्हालेको पहिलो दिन मन्त्रालयमा सचिवसहित सम्बन्धित शाखाका कर्मचारीहरूसँग छलफल गरेको पोखरेलले बताए । 

बुधवार पनि त्यस विषयमा छलफल गरेर समस्या बुझ्नका लागि मन्त्री आफैं राहदानी विभाग पुगेका गृह मन्त्रालयले जनाएको छ ।