प्रेमराजा महतले ल्याए ‘बन्दिपुरैमा २’

लोक गीतका हस्ती प्रेमराजा महतले गत वर्षको आफ्नो हिट लोक गीत ‘बन्दिपुरैमा’को दोस्रो भाग सार्वजनिक गरेका छन् ।

अंग्रेजी नयाँ वर्षको अवसर पारेर उनले शुक्रबार ‘बन्दिपुरैमा –२’ स्वरुप ‘ढुंगेधारैमा’ बोलको गीत ल्याएका हुन् । आफ्नै शब्द एवं संगीत रहेको यो गीत पनि प्रेमराजाले ‘बन्दिपुरैमा’कै गायिका शान्तिश्री परियारसँग गाएका छन् । गीतलाई एरेन्ज भने बि.बि अनुरागीले गरेका हुन् । 

रामजी लामछानेको कोरियोग्राफी एवं अग्रज लोकगायक नारायण रायमाझीको निर्देशन रहेको भिडियोमा प्रेमराजा स्वयंमले अभिनय गरेका छन् ।

उनलाई मोडल रीना थापाले अभिनयमा साथ दिएकी छिन् । ‘बन्दिपुरैमा’मा भने प्रेमराजा रञ्जिता गुरुङसँग प्रस्तुत थिए ।

काजी बाबु कार्की र मुना कार्की निर्माता रहेको ‘ढुंगेधारैमा’लाई मानकृष्ण महर्जनले छायाँकन एवं मिराज अर्यालले सम्पादन गरेका हुन् ।

भिडियोले शनिबार साँझसम्म युट्युबमा ५० हजारभन्दा बढी भ्युज पाइसकेको छ । 

दुई दशकभन्दा लामो अमेरिका बस्दै आएका प्रेमराजाले नेपाल आगमनको क्रममा नयाँ गीत ल्याउँदै आएका छन् ।

उनका ‘सिमसिमे पानीमा’, ‘पानको पात’, ‘बाँझो खेतमा’ जस्ता थुप्रै गीत आजपनि उत्तिकै हिट छन् ।