प्रदेश १ का प्रदेशसभा सदस्य बुद्धिकुमार राजभण्डारी शेर्पा समुदायले लगाउने परम्परागत पोशाक लगाएर बैठकमा सहभागी भएका छन् । प्रदेशसभा १ को दोस्रो कार्यकालको पहिलो बैठकमा उनी शेर्पा पोशाकमा सहभागी भएका हुन् । 

उनी शेर्पा पहिरनमा प्रदेशसभा बैठकमा सहभागी हुँदा अन्य प्रदेशसभा सदस्यहरूले उत्सुकताका साथ जिज्ञासा राखेका थिए । फरक प्रकृतिको पोशाक लगाएर आएका उनीसँग अन्य प्रदेशसभा सदस्यहरूले फोटो खिचाएका थिए । बैठक शुरु हुनुअघिसम्म उनीसँग फोटो खिचाउनेको भीड नै लागेको थियो । 

शेर्पा समुदायको बाहुल्यता रहेको सोलुखुम्बु १(२)बाट प्रदेशसभामा निर्वाचित एमाले उम्मेदवार राजभण्डारीले निर्वाचनअघि नै आफूले जिते शेर्पा समुदायको पोशाक लगाएर प्रदेशसभा बैठकमा सहभागी हुने प्रतिबद्धता जनाएका थिए । शेर्पा समुदायको सम्मानका लागि उनीहरूको पोशाक लगाएर पहिलो बैठकमा सहभागी भएको सांसद राजभण्डारीले प्रतिक्रिया दिएका छन् । शेर्पा पहिरनको संरक्षण एवं प्रचारका लागि आफूले प्रदेशसभाको बैठकमा शेर्पा समुदायको पहिरन लगाएको उनले बताए ।

अन्य बैठकहरूमा आफूलाई मत दिने समुदायको भावनालाई प्रतिनिधित्व गर्दै उनीहरूको परम्परागत पोशाकमा सहभागी हुने तयारी गरेको प्रदेशसभा सदस्य राजभण्डारीले जानकारी दिए । 

यसअघि २०७४मा पनि उनी सोही क्षेत्रबाट निर्वाचित भएका थिए । अघिल्लो कार्यकालको पहिलो बैठकमा पनि शेर्पा पहिरनमै सहभागी भएका थिए । 

अघिल्लो पटक वाम गठबन्धन भएका कारण माओवादी केन्द्रको समेत समर्थनमा जितेका उनले यसपटक भने माओवादीकै राजेन्द्र बस्नेत (शिव)लाई पराजित गरेका थिए । उनी अघिल्लो पटक एमाले संसदीय दलको प्रमुख सचेतक थिए । यसपटक उनी प्रदेश सरकारमा मन्त्री बन्ने चर्चा चलिरहेको छ ।