वरिष्ठ क्याप्टेन एवं अभिनेता विजय लामाले चलचित्र ‘अन्तिम संस्कार’ आइरहेका भन्दा बिल्कुलै फरक रहेको दाबी गरेका छन् । निर्माता, निर्देशक एवं कलाकारहरूले समेत निकै चुनौती मोलेर चलचित्रमा काम गरेको र एउटा उत्कृष्ट चलचित्र बनेको उनले बताए । 

आफूले हरेक चलचित्रमा केही फरक खोज्ने गरेको र ‘अन्तिम संस्कार’मा त्यो कुरा पाएपछि काम गरेको अभिनेता लामाले बताए । 

‘कलाकार भएपछि केही फरक गर्नुपर्छ । केही चुनौती मोल्न सक्नुपर्छ’, उनले भने, ‘यो खालको चलचित्रमा काम गर्न जो–कोही नेपाली कलाकारले आँट गर्न सक्दैनन् ।’ निर्माताले पनि ठूलो चुनौती मोलेर चलचित्र निर्माण गरेको उनको भनाइ छ । 

‘अन्तिम संस्कार’लाई लण्डनमा फिल्म मेकिङ पढेर आएका प्रदीप शाहीले निर्देशन गरेका हुन् । निर्देशकको केही समयको रिसर्च, कलाकारहरूको वर्कशपपछि मात्रै चलचित्र छायाँकनमा गएको थियो । चलचित्रका लागि अभिनेता लामाले २० केजी तौल घटाएको स्मरण गरे । 

हिमाल पारीको जिल्ला मुस्ताङमा माइनस डिग्री सेल्सियस तापक्रममा चलचित्रको छायाँकन गरिएको थियो । दिनको १८ देखि २१ घण्टासम्म खटिएर चलचित्रको छायाँकन गरिएको समेत अभिनेता लामाले स्मरण गरे । 

अभिनेता लामाले आफूले बुवाको अन्तिम संस्कार गरिरहेको समयमा ‘अन्तिम संस्कार’ चलचित्र साइन गरेका थिए । सोही कारण आफ्नो लागि यस चलचित्र भावनात्मक हिसाबले पनि विशेष रहेको उनको भनाइ छ । ‘मलाई बुवाले नै चलचित्र क्षेत्रमा ल्याउनुभएको थियो । उहाँ संसारबाट बिदा हुँदा पनि मलाई चलचित्र दिएर जानुभयो’, लामाले भने, ‘अन्तिम संस्कार’लाई म मेरो बुवाले दिएको अन्तिम उपहारका रूपमा लिएको छु ।’ 

साई प्रोडक्सन नेपालको ब्यानरमा ह्याम्साएर एकाउन्टेनको सहकार्य रहेको चलचित्रमा भाइराजा थापा, राजुकुमार गुरुङ, सुमन राई, उत्सव विष्ट, रविन्द्र श्रेष्ठ कार्यकारी निर्माता रहेका छन् । विनोद सुवेदी क्षितिज निर्माता रहेको चलचित्र सामाजिक एवं सांस्कृतिक कथावस्तुमा निर्माण भएको हो । ‘मर्डर मिसयूज’को कथालाई चलचित्रमा समावेश गरिएको छ । चलचित्रमा अभिनेता लामालाई धेरैवटा क्यारेक्टरमा पाउन सकिन्छ । 

‘यो चलचित्र हाम्रो आफ्नो कथा हो । नेपालीहरूको कथा हो । यसमा रहस्य पनि छ । यसमा परम्परा पनि छ । यसमा इमोशन पनि छ’ अभिनेता लामो भने, ‘एकदमै मेहनत गरेका छौँ । दर्शकहरुले रुचाउनुहुन्छ भन्ने पूर्ण विश्वास छ ।’ 

चलचित्रमा विजयका अलावा दिया पुन, एवनराज उप्रेती, त्रिचन्द्र राई, रेश्मा घिमिरे, विशाल पहारी, कृष्णभक्त महर्जनलगायतको शीर्ष अभिनय छ । साथमा श्याम राई, पासाङ शेर्पा, दिग्गज खत्री, सुस्मिता गिरी, आइसा तामाङ, सुरज खालिङलगायतको पनि चलचित्रमा अभिनय छ ।  

चलचित्र विभिन्न अन्तर्राष्ट्रिय अवार्डमा समेत जाने विश्वास अभिनेता लामाले लिएका छन् । यस चलचित्रमार्फत विश्व रेकर्ड राख्ने कुनै कार्य गर्ने योजना रहेको पनि लामाले बताए ।