नेकपा माओवादी केन्द्र प्रदेश १ सरकारमा सहभागी नभए पनि मुख्यमन्त्री हिक्मत कार्कीले माओवादी बाहेकका सत्ता गठबन्धनका अन्य सांसदलाई समेटेर मन्त्री बनाउने भएका छन् ।

मुख्यमन्त्रीको शपथसँगै सत्ता गठबन्धनमा रहेका जसपा र राप्रपाका सांसदलाई पनि उनले मन्त्री बनाउने भएका हुन् ।

‘माओवादीका साथीहरू पहिलो चरणमा सरकारमा नआउने भनेर मिडियाबाट थापा पायौं,’ नेकपा एमालेका प्रमुख सचेतक रेवतीरवण भण्डारीले भने, ‘हामीले मुख्यमन्त्रीलाई मात्रै एक्लै सरकारमा पठाउने कुरा भएन ।’ उनले माओवादीले नाम पठाएपछि मन्त्री बनाउने बताए । 

केन्द्रमा भएको सहमतिप्रति असन्तुष्टि जनाउँदै माओवादी केन्द्रले तत्काल सरकारमा सहभागी नहुने बताउन थालेको छ ।  माओवादी केन्द्र प्रदेश संसदीय दलका नेता ईन्द्रबहादुर आङ्बोले केन्द्रको निर्णयले प्रदेशको सिंगो माओवादी पार्टीको अपमान भएको बताए ।

आइतवार  साँझ सत्तारुढ दलहरूको बैठकले प्रदेशको भागबण्डा गरेको थियो । भागबण्डामा प्रदेशमा माओवादीले सभामुख मात्रै पाएको छ भने मुख्यमन्त्री आलोपालो गर्ने विषय उल्लेख छैन । 

सरकारलाई दिएको समर्थन भने यथावत् रहने माओवादीले जनाएको छ । माओवादी केन्द्रले एमालेसँग आधा–आधा कार्यकाल हुनुपर्ने बताउँदै आएको थियो । 

एमालेका तर्फबाट आइतवार नै मुख्यमन्त्रीमा हिक्मतकुमार कार्की नियुक्त भइसकेका छन् । कार्कीलाई सोमवार दिउँसो २ बजे शपथग्रहण गराउने कार्यक्रम छ । कार्कीको शपथलगत्तै सानो आकारको मन्त्रिमण्डल सोमवारै विस्तार गर्ने तयारी छ ।

माओवादी नभए पनि प्रदेश सरकार बहुमतमै हुन्छ । अहिलेको सत्ता गठबन्धनमा एमालेका ४०, माओवादी केन्द्रका १३ र राप्रपाका ६ र जसपाका १ सांसद छन् । सरकारका बनाउन ४७ सांसद आवश्यक पर्छ । माओवादी नभए पनि एमाले, राप्रपा र जसपाका सांसद मिलेर आवश्यक बहुमत संख्या पुग्छ ।