संसदको रोष्टमबाट रविले भने – छातीमा हात राखेर भन्छु, हाम्रा सांसदबाट कुनै अनियमितता हुने छैन

राष्ट्रिय स्वतन्त्र पार्टीका सभापति रवि लामिछानेले आफू र आफ्ना पार्टीका सांसदले कुनै अनियमितता नगर्ने बताएका छन् ।

उनले विगतको कालखण्डमा भएका भ्रष्टाचारविरुद्ध निर्मम ढंगले छानबिन गर्नुपर्ने लिखित वाचा नबिर्सने बताए । 

प्रतिनिधि सभाको पहिलो दिनको बैठकलाई सम्बोधन गर्दै लामिछानेले जनतामा गरिएको वाचा पूरा गर्ने उनले बताएका हुन् । ‘यो गरिमामय संसदको रोष्टममा उभिएर छातीमा हात राखेर भन्छु, हाम्रा सांसद कहीँकतै अनियमिततामा मुछिनु हुने छैन,’ लामिछानेले भने । 

लामिछानेले जनताप्रति गरेको वाचा जतिसुकै कठिन परिस्थितिमा पनि नबिर्सने बताए । ‘संसदमा हाम्रो आगमन जनताले अपेक्षा गरेर गरिएको आगमन हो, यसमा कुठाराघात भएमा मुलुक चरम निराशामा जानेछ,’ उनले भने । 

लामिछानेले वर्षौंदेखिको भ्रष्टाचारको काण्डले जनता निराश भएकोमा अब छानबिन गर्नुपर्ने बताए । 

‘सरकारको साझा न्युनतम कार्यक्रममा लिखित रूपमै कुनै पनि कालखण्डमा भएका भ्रष्टाचारको छानबिन गर्ने भनिएको छ । जनतामाझ लिखित रूपमा गरेको वाचा पूरा गर्ने त्यो घडीको प्रतिक्षा गरेका छौं,’ उनले भने, ‘गृहमन्त्रीको रूपमा मेरो आग्रह छ, कुनै पनि भ्रष्टाचारमा भएको छानबिन र अनुसन्धान प्रभावित नगर्नुहोला ।’