चार जना उप्रधानमन्त्रीपछि सञ्चार तथा सूचना प्रविधि मन्त्री रेखा शर्मालाई मन्त्रीकाे शीर्ष वरीयता दिइएको छ ।

माओवादी केन्द्रबाट मन्त्री भएकी शर्मालाई उपप्रधानमन्त्रीपछि छैटौं स्थानमा राख्दै मन्त्रीमा शीर्ष वरीयता दिइएको हो । 

नेपाल सरकार प्रधानमन्त्री तथा मन्त्रिपरिषद् कार्यालयले अपडेट गरेको वेबसाइटकाे वरीयतामा शर्मालाई छैटौं नम्बरमा राखिएको छ ।  

शर्माले ४ मंसिरमा भएको प्रतिनिधिसभाको चुनावमा दाङ-२ मा एमालेका प्रभावशाली नेता शंकर पोखरेललाई पराजित गरेकी थिइन् । शर्मा १९३ मतान्तरले विजयी भएकी थिइन् ।

प्रधानमन्त्री पुष्पकमल दाहाल प्रचण्डपछि उपप्रधानमन्त्री एवं अर्थमन्त्री विष्णु पौडेल, उपप्रधानमन्त्री एवं भौतिक पूर्वाधार मन्त्री नारायणकाजी श्रेष्ठ, उपप्रधानमन्त्री एवं गृहमन्त्री रवि लामिछाने र त्यसपछि उपप्रधानमन्त्री एर्व उर्जामन्त्री राजेन्द्र लिङदेनको वरीयता छ । 

यसपटक मन्त्रीमा अधिकांश नयाँ अनुहारका नेता छन् । मन्त्रीको अन्तिम वरीयतामा कानूनका ध्रुवबहादुर प्रधान छन् । उनी २० औं नम्बरमा छन् । 

२५ सदस्यीय मन्त्रिपरिषद्मा युवा तथा खेलकुद र वन मन्त्रालयको जिम्मेवारी भने ताेक्न बाँकी छ । 

११ पुसमा मन्त्री नियुक्त भएका जनमत पार्टीका अब्दुल खानलाई प्रधानमन्त्री कार्यालयले खानेपानी मन्त्रालयको जिम्मेवारी तोकेको जनाएको छ । तर यस अघि नै उनले सपथ लिए पनि उनकाे पार्टी जनमतले असन्तुष्टि जनाएकाे छ ।