प्रमुख प्रतिपक्षी दल नेपाली कांग्रेसका मुख्य सचेतक रमेश लेखकले यती एयरलाइन्सको दुर्घटनापछि सरकारले पर्याप्त जवाफ दिन नसकेको भन्दै संसदको ध्यानाकर्षण गराएका छन् ।

सभामुख चयनका लागि शुरू भएको प्रतिनिधि सभाको बिहीवारको बैठकमा शुरूमै समय लिएर बोल्दै लेखकले विमान दुर्घटनामा ७२ जनाले ज्यान गुमाए पनि सरकारले पीडित, विदेशीको चासो र चिन्तालाई सम्बोधन गर्न नसकेको बताएका हुन् । 

‘संसदको अधिवेशन चालू छ तर यति ठूलो विमान दुर्घटना भएपछि देश भित्र र बाहिर चिन्ता र चासो देखिएको छ । यस विषयमा के भएको भनेर सरकारले सदनलाई जानकारी गराउनुपर्ने । देश बाहिर सबैतिर जानकारी गराउनु थलोका रूपमा संसद प्रयोग गर्नुपर्ने हो तर संसदको आजको कार्यसूचीमा नभएपछि यहाँ ध्यानाकर्षण गराउनुपर्छ । आजको कार्यसूची स्थगित गर्ने वा पछि सारेर ध्यानाकर्षण गराउँ,’ लेखकले भने, ‘पीडितप्रति सदन र सरकार निरपेक्ष हुन सक्दैन । सभामुखमार्फत सरकारलाई रुलिङ गरियोस् । यो बारेमा जानकारी गराएर नागरिकलाई आश्वस्त गरियोस् । अन्तर्राष्ट्रिय रूपमा उत्पन्न भएको चासो र चिन्तालाई सम्बोधन गरियोस् ।’