भौतिक पूर्वाधार तथा यातायात मन्त्रालयले मोटरसाइकल तथा स्कुटरको पछाडि बस्ने यात्रुलाई पनि हेल्मेट अनिवार्य गर्नेबारे छलफल शुरु गरेपछि सर्वसाधारणको चासो बढेको छ । सोमबार मन्त्रालयमा भएको छलफल पछि त्यसबारेमा व्यापक आलोचना पनि शुरुभएको छ । तर सरकारले सो दवाव विश्व स्वास्थ्य संगठन (डब्लुएचओ) ले दिएको जनाएको छ । 

सो संस्थाले मोटरसाइकलको पछाडि बस्ने यात्रुको सुरक्षाका लागि सरकारले पर्याप्त ध्यान दिनुपर्ने सुझाव दिएको छ । सो संस्थाले मन्त्रालयलाई दवाव दिएपछि त्यसबारेमा छलफल शुरुभएको मन्त्रालयका एक पदाधिकारीले बताए । मन्त्रालयमा भएको छलफलमा विश्व स्वास्थ्य संगठनका प्रतिनिधि ग्याम्पो दोर्जीले डबल हेल्मेटको प्रचलन अन्तर्राष्ट्रिय रुपमै अनिवार्य भइसकेकाले नेपालमा पनि त्यसको कार्यान्वयन हुनुपर्ने सुझाव दिएका थिए । मन्त्रालयका एक अधिकारीका अनुसार डब्ल्यूएचओले यस्तो नियम लागु गर्न सरकारसँग वकालत गरिरहेको छ ।

‘नेपालले अन्तर्राष्ट्रिय मञ्चहरुमा सवारी दुर्घटनाबाट हुने मृत्युदर घटाउने प्रतिवद्धता गरेको छ, त्यसको अनुगमन डब्ल्ययूएचओले गरिहरेको छ । मन्त्रालयले त्यसबारेमा छलफल थाले पनि सरोकारवाला सबै पक्षसँग छलफल पछि मात्र त्यस विषयमा ठोस निर्णय लिइने ती अधिकारीले बताए । अहिले त्यसबारेमा सकारात्मक र नकारात्मक दुवै किसिमको प्रतिक्रिया बाहिर आए पनि मन्त्रालयले तत्काल त्यसबारेमा निर्णय गरिनहाल्ने उनले बताए । यसअघि पनि सरकारले डबल हेल्मेट लगाउने निर्णय गरेको थियो । तर त्यसको व्यापक आलोचना भएपछि निर्णय फिर्ता लिएको थियो । 

यातायात व्यवस्था विभागका अनुसार मोटरसाइकल दुर्घटनामा धेरैजसो २० देखि ३५ वर्षसम्मका युवाहरुले ज्यान गुमाइरहेका छन् । बढ्दो मोटरसाइकल दुर्घटनाले हुने मानवीय, सामाजिक र आर्थिक क्षति न्यूनीकरण गर्न आवश्यक रहेको विभागको पनि भनाइ छ । डबल हेल्मेट लगाउँदा दुर्घटनामा पर्ने यात्रुको सुरक्षाका लागि भएकाले त्यसमा सकारात्मक सोच राख्नुपर्ने विभागको बुझाइ छ । 

कानुनी व्यवस्थाअनुसार पछाडि बस्ने यात्रुले पनि हेल्मेट लगाउनु पर्छ । तर अहिलेसम्म त्यसको ठोस कार्यान्वयन हुन सकेको छैन । यसअघि सरकारले सो कानुन कार्यान्वयनको प्रयास गर्दा आलोचना भएपछि पछाडि हटेको थियो  । डबल हेल्मेट लगाउने निर्णय व्यापारीहरुसँगको मिलेमतोमा आउने गरेको टिप्पणी बजारमा हुनेगरेको छ ।