एमाले अध्यक्ष केपी ओलीले बिहीबार विराटनगरमा सञ्चारकर्मीसँग सरकार संकटमा नपर्ने बताएका छन् ।

गृहमन्त्रालयको विषयले सत्ता गठबन्धनमा नै खटपट आउने सक्नेतर्फ संचारकर्मीले सोधेको प्रश्नमा ओलीले सरकार संकटमा पर्छ जस्तो नलाग्ने बताएका थिए ।

‘मुख्य कुरा राजनीतिक एजेण्डा कार्यान्वयन गर्ने प्रतिबद्धता हुन् । सरकार संकटमा पर्छ भजस्तो लाग्दैन । तर प्रणालीमा अस्थिरता रोपिएको छ । निर्वाचन लगत्तैदेखि भनेको थिएँ असाधारण अस्थिरतमा देश छ भनेर । राजनीतिक अस्थिरता रोपिएको छ’ ओलीले भनेका थिए, ‘नेपाल कहिल्यै पनि स्थिरतामा चलेन । राणा र राजशाही हुँदा दमनले अस्थिरता जस्तो देखियो । दमन र नियन्त्रणका भरमा चले ।

तर जब बज डेमोक्रेसी भन्यो तब बढी अस्थिरता हामीले भोग्यौं । ७ सालमा राणा शासन ढलेपछि कुनै सरकार ५ वर्ष चलेन ।’

ओलीले शासन प्रणाली मुख्य हो भन्दै शासन प्रणालीलाई कसरी अगाडि बढाउने र निर्वाचन प्रणालीलाई कस्तो विधिमा लाने भन्ने पनि मुख्य विषय भएको बताए ।

लोकतन्त्रलाई बढी संस्थागत र सुदृढ गर्न सकिन्छ भन्नेमा लाग्नुपर्ने ओलीको भनाइ थियो ।

नागरिकताको मुद्दामा दोषी पाइएपछि १९ सिट भएको राष्ट्रिय स्वतन्त्र पार्टीका सभापति रवि लामिछानेले गृह मन्त्रालय नपाए सरकार छोड्नेसम्मको चेतावनी दिइरहेका बेला ओलीले सरकारको संकटबारे आजै बोलेका हुन् ।

लामिछानले पनि फेसबुकमा धम्कीपूर्ण स्टाटस लेख्दै सरकारबाट फिर्ता हुनेसम्मको संकेत गरेका छन् ।

‘अब मलाई भन्न बाँकी,गर्न बाँकी, लेख्न बाँकी  केही भए भनीहाल्नुहोला, गरीहाल्नु होला, लेखिहाल्नु होला। मेरो मौनता आज सम्मका लागि मात्रै हो। म अभिमन्यु होइन।’ लामिछानेले लेखेका छन् । 

आजै रास्वपाले केन्द्रीय समिति र संसदीय दलको संयुक्त बैठक पनि डाकेको छ । यो बैठकले सरकारबाट बाहिरिन सक्ने निर्णय गर्ने बुझिएको छ ।