राष्ट्रपति निर्वाचनमा किचलो खडा गर्ने कांग्रेसको दुराशय देखियो– केपी ओली

नेकपा एमालेका अध्यक्ष केपी शर्मा ओलीले राष्ट्रपति निर्वाचनमा किचलो खडा गर्ने दुराशय देखिएको आरोप लगाएका छन् ।

तर, कांग्रेसले थापेको ढोक्सामा माछो नपर्ने ओलीले टिप्पणी गरे ।

आइतबारको प्रतिनिधि सभा बैठकको विशेष समयमा ओलीले सभामुख र राष्ट्रपति निर्वाचन प्रभावित गर्न कांग्रेसले हठातमा प्रधानमन्त्रीलाई विश्वासको मत दिएको आरोप लगाएका हुन् ।

‘आफू बाहेक अरूको नेतृत्व स्वीकार नगर्ने कांग्रेसले सरकारलाई हठात् विश्वासको मत दियो । कांग्रेसको समर्थनलाइ सरकारमाथि विश्वास गरेको मान्न सकिँदैन । ढोक्सा थापेको हो’ ओलीले भने, ‘मैले प्रधानमन्त्रीले विश्वासको मत दिने क्रममा पनि भनेको थिए, ढोक्सा थापेको होइन भने स्वागत छ भनेर । ढोक्सा बेलुका थापिन्छ, अँध्यारामो माछा मार्न खोजिन्छ, बिहान भएपछि रित्तो डोको बोको घर फर्क्यो । सरकारमाथिको विश्वास होइन, कांग्रेसले सभामुख र उपसभामुख निर्वाचनमा किचलो खडा गर्ने दुराशय देखिन्छ ।’

ओलीले प्रधानमन्त्रीलाई पिँजडामा राख्न खोजेको कांग्रेसको आरोपको खण्डन गर्दै प्रधामनन्त्री संविधानबाहिर फुक्काफाल नहुने टिप्पणी गरे ।

ओलीले राष्ट्रपति निर्वाचनमा राष्ट्रिय सहमतिको बहस भइरहेकोमा आपत्ति जनाए ।

‘पुस १० गते (नयाँ सरकार बन्नुअघि) निषेधको राजनीति उत्तानो परेको छ, सहमति, सहमति भनिराख्या छ । सहमति गरौँ न- राष्टियता, विकास, सुशासन, राहत सहुलित पुर्‍याउने सवालमा सहमति गरौँ ।’