नेकपा (एमाले) का सचिव तथा सांसद योगेशकुमार भट्टराईले राष्ट्रपति विद्यादेवी भण्डारीले संसदमा गरेको सम्बोधनमार्फत अर्थतन्त्रलाई माथि उकास्नुपर्ने कुरामा जोड दिएको बताए।

शुक्रबार संसदको दुवै सदनको बैठकपछि सञ्चारकर्मीसँग कुराकानी गर्दै सचिव भट्टराईले राष्ट्रपतिले प्रतिकूल रहेको अर्थतन्त्रलाई अनुकूलता बनाउन उपाय अवलम्वन गर्नुपर्नेमा जोड दिए।

सम्बोधनको क्रममा राष्ट्रपतिले राष्ट्रिय उत्पादन, आयात प्रतिस्थापन र वैदेशिक व्यापार घाटा सन्तुलनलगायत विषयमा जोड दिएको बताए।

राष्ट्रपतिले सम्बोधन गरेका विषयवस्तुलाई सरकारले आगामी नीति तथा कार्यक्रम बनाउँदा मार्गदर्शनको रूपमा लिनुपर्ने बताए।

उनले भने, ‘विशेषगरी उहाँले अहिले नेपालले हाम्रो मुलुकले भोगिरहेका केही गम्भीर आर्थिक समस्याहरूको बारेमा लामो व्याख्या गर्नुभएको छ । उहाँको वक्तव्यको महत्वपूर्ण हिस्सा त्यसमा छ । मुलुकको आर्थिक स्थिति हामीले सोचेजस्तो छैन । प्रतिकुल अवस्थामा छ । त्यसलाई अनुकुलतामा बदल्नको निम्ति तत्काल आवश्यक उपायहरू अवलम्वन गर्नुपर्छ भन्ने कुरा उल्लेख गर्नुभएको छ ।’