नेपाली कांग्रेसका सांसद चन्द्र भण्डारीले देश र सरकार सञ्चालक नेताहरू निकम्मा बन्दा देश माफियाहरूको हातमा पुगेको टिप्पणी गरेका छन् ।

कृषिदेखि मेडिकलसम्म जताततै माफिया राज चल्दा सरकार निकम्मा र लाचार बनेको उनले आरोप लगाए । 

बुधवार बसेको प्रतिनिधिसभा बैठकको विशेष समयमा भण्डारीले सरकार सञ्चालकहरूको गैरजिम्मेवारीका कारण जनता गरीबीमा पिल्सिएको आरोप लगाएका हुन् । असक्षम नेताहरू पार्टीभन्दा माथि उठेर बनबास जाँदा फरक नपर्ने बताए । 

‘विश्व टेलिमेडिसिनको युगमा गयो, भारतमा केजरीवालले ६ महिनामा १७ सय शय्याको अस्पताल बनाएर दिल्लीका जनतालाई निःशुल्क उपचारको कुरा गरेका छन्,’ भण्डारीले भने, ‘नेपालका अस्पतालमा क्यान्सर चेक गर्ने मशिन छैन । सरकारले गरे ३ हजारमा हुने जाँच गर्न ६० हजार रुपैयाँ तिर्नुपरेको छ । हामी सरकार र जनताका प्रतिनिधि भन्छौं, माफियातन्त्र हाबी भएको छ, माफियातन्त्र कति दिन सहेर बस्ने ?’ 

नेपालका नेताहरू जनताका अपेक्षा पूरा गर्न असक्षम भएको उनले टिप्पणी गरे ।