नेपाली कांग्रेसका केन्द्रीय सदस्य प्रदीप पौडेलले कांग्रेसका कारण नभई आफ्नै कारणले सत्ता गठबन्धन कमजोर बनेको टिप्पणी गरेका छन् ।

नेकपा एमाले अध्यक्ष केपी शर्मा ओलीको ‘सुपर प्रधानमन्त्री’ बन्ने फूर्ति कम भएको उनले बताए । 

बुधवार बसेको प्रतिनिधिसभा बैठकको विशेष समयमा पौडेलले एमाले अध्यक्ष ओलीप्रति आक्रोश पोखेका हुन् । ‘प्रतिनिधिसभा बैठकको शुरूमै संसद विघटनको महिमा गान सुन्यौं, त्यो कायरता छोप्न बहादुरी प्रदर्शन गरिएको छ । अब कायरता दोहोरिन दिइने छैन । संसदको रोस्टमबाट सर्वोच्च अदालतलाई आफ्नै पार्टीको कानून विभागजस्तो ढंगले टिप्पणी गर्ने काम गरिएको छ । संसद विघटनको भोक र सनक पाइयो,’ पौडेलले भने ।

कांग्रेसले प्रधानमन्त्रीलाई विश्वासको मत दिँदा ओलीले संसदमा ढोक्सा भन्ने शब्द चर्चित बनाएको उनले बताए । ‘बालकोटमा हतारहतार प्रसाद थाप्न बनेको गठबन्धन किन कमजोर भयो ? जसपा सरकारमा किन गएन कांग्रेसले ढोक्सा थापेर ? ८ जनाको बैठक हुने उच्चस्तरीय संयन्त्रमा अहिले ४ जनाको बैठक हुने गरेको छ, बाँकी नेताहरू कता जानुभयो ? कांग्रेसले ढोक्सा थापेर हो ?’ पौडेलले प्रश्न गरे । 

पौडेलले आफू अनुकूलको व्यक्तिलाई राष्ट्रपति बनाउन ओलीले प्रयत्न गरिरहेको टिप्पणी गरे । ‘प्रधानमन्त्रीभन्दा माथि सुपर प्रधानमन्त्री भएर चलाउन खोज्नेको फुर्ति किन सुस्त छ ? अहिले राष्ट्रपति होइन, रबर स्ट्याम्प राष्ट्रपति चाहिएको छ, आवश्यक पर्‍यो भने सचिव लुकाउने राष्ट्रपति चाहिएको छ,’ ओलीप्रति कटाक्ष गर्दै पौडेलले भने ।