हेटौंडामा जारी सहिद स्मृति स्थानीय तह अन्तर्राष्ट्रिय फुटबल प्रतियोगितामा सशस्त्र प्रहरीको एपीएफ क्लब सेमिफाइनलमा प्रवेश गरेको छ । हेटौंडा–५, पिप्लेस्थित क्याम्पा रंगशालामा आज भएको क्वाटरफाइनल खेलमा त्रिभुवन आर्मी क्लबलाई टाइब्रेकरमा ४– २ को गोलअन्तरले पराजित गर्दै सशस्त्र प्रहरीको एपीएफ क्लबले सेमिफाइनलको यात्रा तय गरेको हो ।  

डिफेन्डिङ च्याम्पियन समेत रहेको त्रिभुवन आर्मी क्लब भर्सेज सशस्त्र प्रहरीको एपीएफ क्लबबीच भएको निकै प्रतिस्पर्धात्मक खेलको पहिलो हाफमा  दुवै टिमले समान अवसरहरू प्राप्त गरेपनि दुवै टिमले सदुपयोग गर्न भने सकेनन् ।

 खेलको  २८ औ मिनेटमा एपीएफका मणि लामाले डिबक्स भित्रबाट प्रहार गरेको बल गोल पोप्ट नजिकै बाहिर जाँदा गोल हुनबाट चुक्यो । यस्तै आर्मीका नवयुग श्रेष्ठले ३६ औ मिनेटमा राम्रो अवसर प्राप्त गरेपनि त्यसको सदुपयोग गर्न सकेनन् ।

 निर्धारित समयको पहिलो हाफमा दुवै टिमको कुनैपनि गोल हुन सकेन । यस्तै दोस्रो हाफको सुरुवाती समयमा आक्रमण खेल प्रदर्शन गरेको त्रिभुवन आर्मी क्लबले ५३ औ मिनेटमा विपक्षी गोलपोप्ट नजिकै पाएको फ्रिकिक बलको अवसरलाई पुग्न खेर फाल्न पुग्यो । आर्मीका टेक बहादुर बुढाथोकीले हानेको प्रहार गोल पोप्ट नजिकैबाट बाहिरिन पुग्यो । 

त्यस्तै आर्मीकै दीपक गुरुङको लङसुट पासलाई दिनेश हेम्जनले खेर फाले । उता एपीएफ क्लबले पनि ७२ औ मिनेटमा विपक्षी टिमको गोलपोप्ट नजिकै बुद्धिमान राईले दिएकोराम्रो पासलाई सनिश श्रेप्ठले सदुपयोग गर्न सकेनन् । निकै रोमाञ्चाक  प्रतिस्पर्धात्मक खेलको निधारित समयमा दुवै टिमले कुनैपनि गोल हुन नसक्दा खेल टाइब्रेकरको धकेलिन पुग्यो । 

टाइब्रेकरका त्रिभुवन आर्मी क्लबका टेकबहादुर बुढाथोकी र विकास खवासले मात्र गोल गर्न सफल भए । नवयुग श्रेष्ठ र दीपक गुरुङको प्रहार सशस्त्रका गोलरक्षक राजु नगरकोटीले उत्कृष्ट बचाउ गरे  ।
यस्तै सशस्त्र प्रहरीको एपीएफ क्लबका लागि  नवीन लामा, सुदिप सिख्राकार, सनी श्रेष्ठ र दिपेश धिमालले गोल गरे । अन्ततः सशस्त्र प्रहरी ४– २ को गोलअन्तरले विजेता हुँदै सेमिफाइनलमा आफनो सिट सुरक्षित गर्न पुग्यो ।

आज भएको खेलमा सशस्त्रका गाोलरक्षक राजु नगरकोटीले म्यान अफ दी म्याच घोषित भए । उनले उनले नगद १० हजार रूपैयाँ प्राप्त गरेका छन् । प्रतियोगिताको उपाधि विजेताले १५ लाख रुपैयाँ र उपविजेताले १० लाख रुपैयाँ प्राप्त गर्नेछन भने प्रतियोगिताको सर्वोत्कृष्ट खेलाडीले नगद ५० हजार रुपैयाँ प्राप्त गर्नेछन् । 

त्यस्तै विधागत उत्कृष्ट खेलाडीहरूले २५–२५ हजार रुपैयाँ प्राप्त गर्नेछन् । भोलि (शुक्रबार) घरेलु (आयोजक) टोली मकवानपुर ११ र मनाङ मर्स्याङ्दी क्लब भिड्ने भएका छन् ।