राष्ट्रपतिमा नेकपा माओवादी केन्द्रको समर्थनको आश्वासन पाएपछि नेपाली कांग्रेसले उम्मेदवारबारे आन्तरिक छलफल शुरू गरेको छ । 

माओवादी नेताहरूसँग बुधवार साँझ भएको छलफलपछि देउवाले पार्टीभित्र छलफल शुरू गरेका हुन् । 

आफूहरू आन्तरिक छलफलमा रहेको भन्दै कांग्रेस प्रवक्ता डा. प्रकाशशरण महतले कार्यसम्पादन समितिको बैठक बसेर राष्ट्रपतिमा उम्मेदवारबारे निर्णय गर्ने जानकारी दिए । 

‘राष्ट्रपतिको उम्मेदवारबारे हामी आन्तरिक छलफलमा छौं, कार्यसम्पादन समितिको बैठक राख्ने तयारी छ,’ महतले लोकान्तरसँग भने । पार्टीमा सबै पक्षको भन्दा देउवाले आफू निकटका नेतासँग बिहीबार बिहान छलफल गरेका हुन् । 

माओवादी, जसपा र नेकपा एकीकृत समाजवादी, लोसपा सहितका दलसँग पनि बिहीवारै छलफल गर्ने तयारीमा कांग्रेस रहेको जानकारी महतले दिए । 

‘हामीले राष्ट्रपतिमा उम्मेदवारी दिने भएपछि बढी तयारी र अग्रसरता हामीले नै लिनुपर्छ । यसको लागि आन्तरिक र द्विपक्षीय छलफल चलिरहेका छन् । यो छलफलपछि यसअघिको गठबन्धनमा सँगै रहेका दलहरूको बैठक गर्ने तयारीमा हामी छौं,’ महतले लोकान्तरसँग भने ।

द्विपक्षीय छलफलपछि भ्याए बिहीवारै नभए शुक्रवार बिहान पार्टीको बैठक बस्ने जानकारी महतले दिए । 

बुधवार राति बालुवाटारमा भएको छलफलमा राष्ट्रपति उम्मेदवारमा माओवादीले समर्थनको आश्वासन दिएको कांग्रेस नेताहरुले दाबी गरिरहेका छन् । कांग्रेसको तर्फबाट वरिष्ठ नेता रामचन्द्र पौडेल र कृष्ण सिटौला राष्ट्रपतिको उम्मेदवार बन्ने चर्चा छ ।

फागुन २५ गते हुने राष्ट्रपति निर्वाचनका लागि आगामी १३ गते शनिवार उम्मेदवार मनोनयनको कार्यसूची छ ।