अघिल्ला सरकारले खारेज गरेका कार्यालय वर्तमान सरकारले ब्युँताउन थालेको छ ।

कर्मचारी अभाव तथा खर्च कटौती गर्न भन्दै तत्कालीन मुख्यमन्त्री राजेन्द्र राई नेतृत्वको सरकारले खारेज गरेका कार्यालय मुख्यमन्त्री हिक्मतकुमार कार्की नेतृत्वको सरकारले ब्युँताउन थालेको छ । 

कोशी रिफ्रेसमेन्ट सेन्टरको अलग्गै कार्यालय पुनः स्थापना गर्न थालिएको छ । १ वर्ष अगाडि खारेज गरेको सेन्टर परियोजना हेर्ने कार्यालय कोशी प्रदेश सरकारले १ महिनाभित्रमा स्थापना गरी सञ्चालनमा ल्याउने भएको छ । 

सरकारले प्रदेशको गौरवको आयोजनाको रूपमा रहेको सेन्टर हेर्ने गरी स्थापना भएको परियोजना हेर्ने कार्यालय चैत महिना भित्रमा स्थापना गरी सञ्चालनमा ल्याउने भएको हो । गौरवको आयोजना हेर्ने कार्यालय छुट्टै नहुँदा काममा कठिनाइ भएको भन्दै प्रदेश सरकारले चाँडै पुरानो कार्यालय स्थापना गरी सञ्चालनमा ल्याउने गृहकार्य पनि शुरू गरेको छ ।

२२ बिघा क्षेत्रफलमा २ अर्ब ८ करोड रुपैयाँ लागतमा कोशी रिफ्रेसमेन्ट सेन्टर बनाउन २०७५ माघ २४ गते तत्कालीन मुख्यमन्त्री शेरधन राईले शिलान्यास गरेका थिए । शिलान्यास गरेको २ वर्षपछि २०७७ पुस १० गते परियोजना हेर्नका लागि सुनसरीमा कोशी रिफ्रेसमेन्ट सेन्टर परियोजना कार्यालय स्थापना गरिएको थियो । ९औं तहको आयोजना प्रमुखसहित १० जनाको दरबन्दी कायम गरी कार्यालय स्थापना गरिएको थियो ।

राजेन्द्र  राई मुख्यमन्त्री भएर आएपछि २०७८ चैत २४ गते परियोजना खारेज गरेको थियो । परियोजना खारेज गरेर रिफ्रेसमेन्ट सेन्टर हेर्ने जिम्मा शहरी विकास तथा भवन कार्यालय मोरङलाई २०७९  वैशाख १५ गतेदेखि दिइएको थियो ।  

परियोजना हेर्ने कार्यालय खारेज गरी भवन कार्यालयलाई दिएपछि बजेट अभावका कारण प्रदेश गौरवको आयोजना अलपत्र परेको थियो । आयोजनाका लागि प्रदेश सरकारले पर्याप्त मात्रामा बजेटको व्यवस्था नगरेपछि अलपत्र बन्न पुगेको कोशी रिफ्रेसमेन्ट सेन्टरको कोशी प्रदेशका मुख्यमन्त्री हिक्मतकुमार कार्कीसहित भौतिक पूर्वाधार विकास मन्त्री दुर्गाप्रसाद चापागाईंले अनुगमन र निरीक्षण गरे । प्रदेश सरकारको गौरवको परियोजनाको निरीक्षण गरेपछि मुख्यमन्त्री कार्कीले २ वर्षभित्रमा कोशी रिफ्रेसमेन्ट सेन्टर सञ्चालनमा आउने गरी काम गर्नुपर्ने बताए ।

कोशी रिफ्रेसमेन्ट सेन्टरको निर्माण गर्ने ठेक्का कविन्द्र/ नव सिर्जनशील जेभी कीर्तिपुरले पाएको छ । निर्माण शुरू भएको २ वर्षमा भौतिक प्रगति ६० प्रतिशत भएको शहरी विकास तथा भवन कार्यालय मोरङका कार्यालय प्रमुख रुद्रनारायण मिश्रले बताए । सेन्टरमा थकाली खाना घर, हेल्थपोस्ट, प्रशासनिक भवन, प्रहरी चौकी, पर्खाल, गेट लगायतको काम भएको प्रमुख मिश्रले बताए ।

योजनाको कूल लागतको २५ प्रतिशत मात्र बजेट प्रथम चरणमा राखिएकाले डीपीआर अनुरूप कोशी रिफ्रेसमेन्ट सेन्टरको मुहार फेर्न कठिनाइ भएको बताए । केही क्षेत्रमा अहिले पनि जग्गा अधिग्रहण र मुआब्जा बाँकी रहेकाले काममा अवरोध  हुनसक्ने उनले बताए ।

रिफ्रेसमेन्ट सेन्टर परियोजना अन्तर्गत कोशी कटानमा सुविधा सम्पन्न होटल, ७ तले कम्प्लेक्स, हेल्थपोस्ट भवन, पेट्रोल पम्प, बसपार्क, भ्यू टावर, स्वीमिङ पुल, सिनेमा हल र लिफ्ट सहितको आकाशे पुल लगायतका संरचना निर्माण गरिनेछ ।