नेपाली कांग्रेसका नेता तथा पूर्वगृहमन्त्री बालकृष्ण खाँणले प्रालिमा गएको यातायात व्यवसायीलाई संघ/समितिमै फर्काउनुपर्ने बताएका छन्।

यातायात व्यवसायी संघ/संस्थालाई प्राइभेट कम्पनीमा लैजानु गलत रहेको खाँणले टिप्पणी गरे । 

पश्चिम नेपाल बस व्यवसायी प्रालिको शनिबार बुटवलको साधारणसभामा नेता खाँणले भने, ‘कुनै पनि सरकारले ल्याएको नीति मान्दिनँ भन्न त मिल्दैन । तर, यातायात व्यवसायीलाई तत्कालीन सरकारले प्रालिमा लैजाने गरेको निर्णय गलत छ । पुरानै मोडालिटीको अनुसार नै चल्नेगरी नीति परिवर्तन गर्नुपर्छ । प्रालि हटाएर संघ नै बनाउनुपर्छ ।’ 

बुटवल यातायात सञ्जालको मूल केन्द्र रहेको बताउँदै नेता खाँणले यस क्षेत्र गतिशील बनाउँदै लैजानुपर्ने बताए ।

‘सडककै कारण यातायातका साधनमा ठूलो नोक्सानी भएको छ । सडक निर्माण गर्ने मोडालिटी पनि परिवर्तन गरौं,’ उनले भने।

मुलुकलाई आर्थिक संकटबाट निकास दिन सबै पक्षबीच सहमति र सहकार्य गर्नुपर्ने बेला आएको उनले बताए ।