नेपाली कांग्रेसका महामन्त्री विश्वप्रकाश शर्माले मिटरब्याजी पीडितहरूलाई भेट्न प्रधानमन्त्रीले ढिलो गर्नु नहुने बताएका छन् ।

बुधवार भृकुटीमण्डपमा स्वदेशी जुत्ता प्रदर्शनीको अवलोकन गरेपछि सञ्चारकर्मीसँग कुरा गर्दै उनले प्रधानमन्त्री पुष्पकमल दाहाल ‘प्रचण्ड’ले मिटरब्याजी पीडितहरूलाई भेट्न ढिलो गर्नु नहुने बताए । उनले मिटरब्याजी पीडितहरूले प्रधानमन्त्रीसँग प्रत्यक्ष भेट गर्न चाहेकाले १३ दिन लगाएर तराईबाट हिँड्दै आएका नागरिकलाई अविलम्ब भेट गर्न आग्रह गरे ।

महामन्त्री शर्माले पीडितलाई प्रधानमन्त्रीले भेट गर्नु भनेको उनीहरूको मुद्दा सम्बोधनको प्रक्रिया शुरू हुनु रहेको बताए । उनले मिटरब्याजी पीडितहरूले उठाएका मुद्दाको सम्बोधनका लागि आवश्यक कानून निर्माण गर्न र संसदमा छिटोभन्दा छिटो कानूनी प्रक्रिया अघि बढाउनुपर्नेमा जोड दिए । उनले मिटरब्याजी पीडितहरू कुनै पनि राजनीतिक दलको छत्रछायाँमा रहेको भए पनि उनीहरूको माग सम्बोधन गर्नु सरकारको दायित्व भएको बताए ।

महामन्त्री शर्माले वर्तमान अवस्थामा लोकतन्त्र भनेको कतिले बोल्न पाए भन्ने नभई बोलेका कुरा राज्यले कति सम्बोधन गर्‍यो भन्ने कुरा मुख्य रहेको उल्लेख गरे ।

महामन्त्री शर्माले भने, ‘मिटरब्याजीसँग सरकारले २–३ वटा कुरा क्रमशः गर्नुपर्छ । मिटरब्याजीहरूले जो कोही गएर संवाद गर्दा पनि उहाँहरूले प्रधानमन्त्रीसँग भेट्न चाहन्छौं भन्नुभएको छ । प्रधानमन्त्रीज्यूलाई म के आग्रह गर्छु भने मिटरब्याजीहरूको संघर्षका लागि १३ दिन लगाएर तराईबाट हिँडेर आएका नागरिकलाई हिजो घरमा पुगेर २ हात जोडेर मत माग्न सक्थ्यौं, आज पैदल हिँडेर आएका नागरिकलाई प्रधानमन्त्रीले भेट दिन ढिलो गर्नु हुँदैन । प्रधानमन्त्रीले अविलम्ब भेट दिनुपर्छ । त्यसले उहाँको आन्दोलनमा उठाएको मुद्दाको सम्बोधनको प्रक्रिया प्रारम्भ हुन्छ । दोस्रो उहाँहरूले उठाएको मुद्दाको सम्बोधन गर्न आवश्यक कानून बनाउने, संसदबाट प्रक्रिया अघि बढाउने, तेस्रो कुरा मिटरब्याजीहरू जुनसुकै राजनीतिक दलको छत्रछायाँमा होऊन्, कांग्रेस, एमाले, माओवादी वा अरु दलका उनीहरूलाई कुनै पनि झमेलामा नराखी काम गर्नुपर्छ । प्रधानमन्त्रीले अविलम्ब भेट्नुपर्छ । हामी उहाँहरूको आन्दोलनको समर्थन गर्न र संसदमा लैजान तयार छौं । लोकतन्त्र कति धेरैले बोल्न पाए होइन, उनीहरूले बोलेका कुरा कति सरकारले सम्बोधन गरेको छ, त्यो अहिलेको लोकतन्त्र हो । उहाँहरूको मुद्दालाई हल गर्नु यो बेलामा राजनीतक दल, राज्य सबैको कर्तव्य हो ।’

महामन्त्री शर्माले अहिलेको परिस्थितिमा मिटरब्याजी पीडितहरूको मुद्दा सम्बोधन गर्नु नै राजनीतिक दल र राज्यको कर्तव्य भएको बताए ।