कांग्रेसले टुंग्यायो उम्मेदवारः तनहुँ १ मा भट्टराई र चितवन २ मा श्रेष्ठ

कांग्रेसले उपनिर्वाचनका लागि २ क्षेत्रका उम्मेदवार टुंग्याएको छ ।

केन्द्रीय कार्यसम्पादन समितिको बैठकले तनहुँ १ र चितवन २ मा वैशाख १० हुने उपनिर्वाचनको लागि उम्मेदवार तय गरेको हो । 

केन्द्रीय कार्यालय सानेपामा बसिरहेको केन्द्रीय कार्यसम्पादन समितिको बैठकले तनहुँ १ बाट गोविन्द भट्टराई र चितवन २ बाट जीतनारायण श्रेष्ठलाई उम्मेदवार बनाएको हो ।

उम्मेदवारबारे कांग्रेसले औपचारिक निर्णय गर्दैछ ।

यी २ जना उम्मेदवार बन्ने पक्का भएको कांग्रेस केन्द्रीय कार्यालयका एक सचिवले जानकारी दिए । 

भट्टराई नेविसंघका पूर्वसभापति हुन् भने श्रेष्ठ कांग्रेस चितवनका पूर्वसभापति हुन् । 

चितवन २ मा चुनाव जितेका रवि लामिछानेको नागरिकता प्रकरणपछि सांसद पद नै खारेज भएपछि उपनिर्वाचन हुन लागेको हो । यो क्षेत्रमा रास्वपाबाट रवि नै फेरि निर्वाचनमा उठ्दैछन् । 

तनहुँ १ बाट कांग्रेसबाट जितेका रामचन्द्र पौडेल राष्ट्रपति भएपछि उपनिर्वाचन हुन लागेको हो । 

बारा २ मा मा भने जसपा अध्यक्ष उपेन्द्र यादव चुनाव लड्दैछन्। उनलाई सत्ता गठबन्धनको समर्थन रहने छ। यहाँबाट निर्वाचित रामसहाय यादव उपराष्ट्रपति भएपछि यो क्षेत्र पनि रिक्त छ।