मन्त्रिपरिषद् विस्तारलगायत समसामयिक राजनीतिक विषयमा छलफल गर्न सत्तारुढ दलहरूको बैठक प्रधानमन्त्री निवास बालुवाटारमा बसिरहेको छ ।

साँझ ५ बजे बसेको बैठकमा मन्त्रालयको भागबन्डा टुंगो लगाउनेबारे छलफल हुने प्रधानमन्त्रीको सचिवालयले जनाएको छ । 

छलफलमा नेकपा (माओवादी केन्द्र) का अध्यक्ष तथा प्रधानमन्त्री पुष्पकमल दाहाल ‘प्रचण्ड’, नेपाली कांग्रेसका सभापति शेरबहादुर देउवा, उपसभापति पूर्णबहादुर खड्का, जनता समाजवादी पार्टी (जसपा) का अध्यक्ष उपेन्द्र यादव र उपप्रधानमन्त्री एवं भौतिक पूर्वाधार तथा यातायातमन्त्री नारायणकाजी श्रेष्ठ, जनमत पार्टीका अध्यक्ष सीके राउत, लोसपाका नेता शरतसिंह भण्डारी, नागरिक उन्मुक्ति पार्टीका अध्यक्ष रञ्जिता श्रेष्ठलगायतको सहभागिता छ। 

प्रधानमन्त्रीको सचिवालयका सदस्य मनहरि तिमल्सिनाका अनुसार झण्डै तीन घण्टादेखि सत्ता गठबन्धनको बैठक जारी छ । 

दलहरूले आफ्नो भागमा परेका मन्त्रालयमा नाम पठाएपछि भ्याएसम्म बिहीवार नै मन्त्रीको शपथ गराउने तयारी भएको थियो। तर बिहीवार साँझ बसेको बैठक लामो समयसम्म चलिरहँदा त्यो सम्भावना टरेर जाने देखिएको छ।  

सरकार विस्तारमा कांग्रेसले ८, माओवादीले ४, नेकपा एस र जसपाले २/२, जनमत, लोसपा, नागरिक उन्मुक्ति र नेपाल समाजवादी पार्टीले १/१ मन्त्रालय पाउँदैछन् । प्रभु साह आमजनता पार्टीबाट मन्त्री बन्नेछन् ।