सर्लाहीका २ वटा चिनी उद्योगले किसानहरूको भुक्तानी दिन आलटाल गरेका छन् ।

उखु क्रसिङ सकेर बन्द भएका अन्नपूर्ण चिनी उद्योग धनकौल र महालक्ष्मी चिनी उद्योग बगदाहलाई उखु दिएका किसानहरूले मिल बन्द भएको एक महिनासम्म पनि भुक्तानी नपाएको गुनासो गरेका छन् ।

यी दुवै चिनी उद्योगबाट महिनौँसम्म भुक्तानी नपाउँदा किसानहरूले बर्सेनि आन्दोलन गर्दै आइरहेका गोडैता नगरपालिका–९, का किसान सीताराम यादवले बताए। 

उनका अनुसार शुरूमा केही किसानलाई भुक्तानी दिएर यी दुवै चिनी उद्योगका सञ्चालक अहिले आफूहरूसँग सम्पर्कभन्दा बाहिर रहेका हुन् । 

'शुरूमा केही किसानलाई भुक्तानी दिइयो, त्यसपछि बाँकी किसानहरूको पैसा दिन चिनी उद्योगहरूले वास्तै गरेनन्', गोडैताका अर्का किसान रामकिरण यादवले भने। चिनी उद्योग बन्द भएको एक महिनासम्म पनि उद्योगी सम्पर्कमा नआउँदा आफूहरूलाई व्यवहार धान्न गाह्रो परिसकेको किसान यादवले बताए। 

उद्योगले उखु बेचेको पैसा नदिँदा बालबालिकाको विद्यालयमा शुल्क बुझाउन मात्र नभई आफ्नो घरखर्चसमेत धान्न नसक्ने अवस्था आएको अर्का उखु उत्पादक किसान राजकरण यादवले बताए। 'उखु खेतीबाटै व्यवहार चलाउने आफू जस्ता दर्जनौँ उखु उत्पादक किसानहरू उद्योगबाट पैसा नपाउँदा साहुमहाजनबाट ऋण लिन बाध्य भएका छन्', राजकरणले गुनासो गरे। 

उखुको पैसा नपाउँदा उखु काट्ने, ढुवानी गर्ने ट्र्याक्टरको पैसा तिर्न नपाएको धनकौल गाउँपालिका–३, का उखु किसान रामस्वार्थ साहले गुनासो गरे। 'उखु फलाउँदादेखि उद्योगसम्म लगेर बुझाउँदासम्मको उधारो छ तर उद्योगले कहिले पैसा दिन्छ भन्ने अयौल छ', उखु किसान साहले भने। ​

बेलैमा भुक्तानी नदिने समस्याका कारण पछिल्ला वर्षमा जिल्लाका किसानहरूले अन्यत्र ठाउँका चिनी उद्योग र सख्खर बनाउने उद्योगलाई उखु बेच्न थालेका उखु उत्पादक किसान राजकुमार उप्रेतीले बताए। उनका अनुसार पछिल्लो समय जिल्लाका उखु उत्पादक किसानहरू उखुभन्दा अन्य खेतीतर्फ समेत आकर्षित हुन थालेका छन् । 

जिल्लाका ३ वटा चिनी उद्योगमध्ये इन्दुशंकर चिनी उद्योग हरिवनबाट भने उखु किसानले भुक्तानी पाइरहेका भए पनि अन्नपूर्ण चिनी उद्योग धनकौल र महालक्ष्मी चिनी उद्योग बगदहले हरेक वर्ष उखु उत्पादक किसानलाई पैसा दिन आलटाल गरेको उत्पादक किसान महासंघ नेपालका अध्यक्ष कपिलमुनि मैनालीले बताए।

जिल्लाका अन्य उद्योगले किसानको  भुक्तानी समयमै नगर्दा उखु खेती घटेको र त्यसको प्रत्यक्ष प्रभाव इन्दुशंकर चिनी उद्योगलाई परेको उद्योगका प्रबन्धक योगनारायण रजकले बताए।