सफ्टवेयर खरिद तथा जडान/विस्तार कार्यमा भ्रष्टाचार गरेको अभियोगमा सिम्रौनगढ नगरपालिकाका तत्कालीन प्रमुख प्रशासकीय अधिकृतसहित ३ जनालाई अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ। 

तत्कालीन प्रमुख प्रमुख प्रशासकीय अधिकृत विश्वराज मरासेनी, लेखा अधिकृत सर्मेन्द्रप्रसाद चौधरी र जिन्सी शाखा प्रमुख सुरेश प्रसाद यादवविरुद्ध अख्तियारले मुद्दा दायर गरेको हो। 

भ्रष्टाचार गरेको उजुरीका आधारमा सिम्रौनगढ नगरपालिका बाराको आर्थिक वर्ष २०७६/०७७ मा जिन्सी व्यवस्थापनको केन्द्रीय प्रणालीसमेत सफ्टवेयर खरिद तथा जडान/विस्तार गर्ने कार्यमा उनीहरूलाई दोषी ठहर गरिएको छ। 

आर्थिक वर्ष २०७६/०७७ मा उनीहरू ३ जनाले मिलेमतो गरी टिप्पणी पेश तथा सफ्टवेयर खरिद कार्यको स्वीकृत गरी १ लाख ९९ हजार ८९७ रुपैयाँ भुक्तानी गरी सफ्टवेयर खरिद गरेको र सो सफ्टवेयर खरिद गरी प्रयोग नै नगरी सरकारी सम्पत्ति बदनियतपूर्वक हानि-नोक्सानी गरेको एवं गराएको देखिएको अख्तियारको आरोप छ। 

उनीहरू तीनै जनालाई भ्रष्टाचार निवारण ऐन, २०५९ को दफा ८ को उपदफा (३) बमोजिम कसुरमा बिगो १ लाख ९९ हजार ८९७ रुपैयाँ कायम गरी ऐनको दफा ८ को उपदफा (३) बमोजिम सजायको मागदाबी गरिएको अख्तियारले जनाएको छ।