वर्ष २०७९ सकिन अब केही दिन मात्रै बाँकी छ । आगामी शुक्रवारबाट नयाँ वर्ष २०८० सँगै नयाँ दशक पनि एकसाथ शुरू हुँदैछ । 

कोरोना महामारीका कारण झण्डै २ वर्ष सुस्ताएको फिल्म क्षेत्र यो वर्ष चलायमान रह्यो । प्रतिशतका हिसाबले हेर्दा ‘हिट’ हुने फिल्मको संख्या पनि झण्डै तेब्बरभन्दा बढी बढेको देखियो ।

शुक्रवारदेखि प्रदर्शनमा आएको ‘बहाव’ वर्षको पछिल्लो नेपाली फिल्म हो । यससँगै वर्ष २०७९ मा घरेलु बक्स अफिसमा प्रदर्शनमा आउने नेपाली फिल्मको संख्या ४९ रह्यो, जुन कोरोनाअघिका वर्षको तुलनामा आधा हो । 

वर्षको शुरूआतमा वैशाख १ गते प्रदर्शनमा आएको फिल्म ‘ए मेरो हजुर ४’ घरेलु बक्स अफिसबाट निकै सकसका साथ लगानी उठाउँदै केही नाफामा गएको बताइन्छ । 

त्यसपछि प्रदर्शनमा आएका ‘मन्त्र’, ‘लक्का जवान’, ‘षट्कोण’, ‘लाइफ इन एलए’ जस्ता फिल्महरू पूर्णतः असफल सावित भए ।  

जेठको १३ गतेबाट प्रदर्शनमा आएको फिल्म ‘कबड्डी ४’ले भने हलमा दर्शकको मेला नै लगाइदियो । लामो समयसम्म यो फिल्म हाउसफूल दर्शकका साथ प्रदर्शन भयो । फिल्मले घरेलु बक्स अफिसबाट २३ करोड हाराहारी कलेक्सन गर्दै सर्वाधिक कमाइको रेकर्ड कायम गर्‍यो । 

‘कबड्डी ४’यता भने फेरि लामो समयसम्म नयाँ नेपाली फिल्मले दर्शक तान्न सकेनन् । असारमा ‘चिसो मान्छे’, ‘घनचक्कर’, ‘दोख’, ‘सम्झना बिर्सना’ र ‘सिल्ली फो’ प्रदर्शनमा आए तर यी कुनै फिल्मले पनि लगानी उठाउन सकेनन् ।

साउनमा ‘पानी फोटो’, ‘म’सँगै पुनः प्रदर्शनमा आएको ‘चपली हाइट ३’ असफल भए । भदौमा ‘प्रेमगञ्ज’, ‘माइकल अधिकारी’, ‘कृष्ण लीला’, ‘प्रकाश’, ‘राधा’, ‘सम्हालिन्छ कहिले मन’, ‘झिंगे दाउ’, ‘ऐना झ्यालको पुलती’, ‘गोर्खा विनिथ द ब्रेभरी’ र ‘शिवानी’ गरी १० फिल्म प्रदर्शनमा आए । यीमध्ये ‘झिंगे दाउ’ लगानी उठाउँदै नाफामा जान सफल रह्यो भने ‘ऐना झ्यालको पुतली’ले दर्शक र समीक्षकबाट राम्रो प्रतिक्रिया पाउन सफल रह्यो । यता ‘प्रकाश’ हिट नभए पनि अभिनेता प्रदीप खड्काले प्रशंसा कमाए । 

असोजमा प्रदर्शनमा आएका ‘प्रेम गीत ३’ र ‘दुई नम्बरी’ले राम्रो व्यापार गर्दा ‘बाबरी’ र ‘हिजो आजका कुरा’ घाटामा गए । कात्तिकमा प्रदर्शनमा आएका ‘के घर के डेरा’ र ‘महापुरुष’ नाफामा गए भने ‘नालापानी’, र ‘लाखे’ले घाटाको व्यापार गरे । 

मंसिरमा प्रदर्शनमा आएका ‘चोर र पुलिस’, ‘मिलन’, ‘पासो’ र ‘डेसान’ ४ वटै फिल्मले लगानीको सानो हिस्सा पनि हलबाट उठाउन सकेनन् । पुसमा ‘डिसेम्बर फल्स’, ‘चि मुसी चि’, ‘गुञ्जन’, र ‘तिम्रो मेरो साथ’ले दर्शक तान्न सकेनन् भने माघमा प्रदर्शनमा आएका ‘जीवनसाथी’, ‘ह्यारीकी प्यारी’, ‘आँधी तूफान २’ र ‘मनसँग मन’ पनि सफल हुन सकेनन् ।

फागुनको पहिलो हप्ता प्रदर्शनमा आएको मल्टिस्टारर फिल्म ‘फूलवारी’ले एक खालको दर्शक ताने पनि अपेक्षित भने चलेन । महंगो लगानीमा निर्माण भएका कारण यस फिल्मले घरेलु बजारबाट लगानी सुरक्षित गर्न नसकेको बताइन्छ । 

फागुन तेस्रो हप्ताबाट प्रदर्शनमा आएकामध्ये ‘छड्के २’ केही दिनमै हलबाट उत्रिँदा ‘छक्का पञ्जा ४’ अहिलेसम्म पनि प्रदर्शन भइरहेको छ । फिल्मले घरेलु बक्स अफिसमा २० करोड हाराहारी कलेक्सन गरिसकेको वितरकको भनाइ छ । चैतमा प्रदर्शनमा आएको ‘प्रेमा’ हलमा केही दिन पनि टिक्न सकेन भने ‘बहाव’ दोस्रो दिनमा प्रदर्शनरत छ ।

कोरोनाअघि १०० हाराहारी नेपाली फिल्म रिलिज हुँदा ४–५ वटा फिल्म मात्र हिट हुन्थे । त्यसको अनुपातमा यसवर्ष आधा संख्यामा फिल्म रिलिज हुँदा नाफामा जाने फिल्मको संख्या बढेको छ ।

‘यस वर्ष अलि धेरै फिल्महरू सफल भए,’ नेपाल चलचित्र निर्माता संघका अध्यक्ष नवल खड्का भन्छन्, ‘फिल्म क्षेत्रका लागि विगतमा भन्दा यस वर्ष धेरै हिसाबले सकारात्मक मान्नुपर्छ ।’ 

स्टारडम, ब्राण्ड र कन्टेन्टमा के बिक्यो ?

यस वर्ष ‘छक्का पञ्जा ४’ जस्तो ब्राण्ड फिल्म र युवा स्टार भनिएका अनमोल केसीको फिल्म ‘छड्के २’ एकैदिनबाट प्रदर्शनमा आए । 

यद्यपि इनिसियल व्यापारमा अगाडि मानिएको अनमोलको फिल्मको दयनीय कलेक्सनले भने सिंगो फिल्म क्षेत्रलाई स्तब्ध बनायो । 

उनको फिल्मको मात्र होइन, दर्शक तान्न सक्ने भनिएका अन्य अभिनेता एवं अभिनेत्रीका फिल्म पनि असफल रहे । धिरज मगर अभिनित ‘बाबरी’ अपेक्षित चलेन । साम्राज्ञी राज्यलक्ष्मी शाहको ‘ह्यारीकी प्यारी’ पनि अपेक्षित चलेन । आकाश श्रेष्ठ र पूजा शर्माको ‘सम्झना बिर्सना’ र ‘सम्हालिन्छ कहिले मन’ दुवै फिल्म असफल भए । आर्यन सिग्देल र उपासना सिंहको ‘डिसेम्बर फल्स’ पनि चलेन । मल्टिस्टारर फिल्म ‘लाखे’ पनि बक्स अफिसमा नराम्ररी पछारियो ।

सफल फिल्महरूलाई हेर्ने हो भने, ‘ए मेरो हजुर ४’, ‘कबड्डी ४’ र ‘छक्का पञ्चा ४’ ब्राण्ड नाम हुन् । यीमध्ये ‘कबड्डी ४’ र ‘छक्का पञ्चा ४’लाई बलियो टीमको फिल्म समेत मान्न सकिन्छ । ‘झिंगेदाउ’ भने कन्टेन्टका कारण चलेको बुझ्न सकिन्छ । ‘दुई नम्बरी’ चल्नुमा दयाहाङ राई र सौगात मल्लको सहकार्य, निर्देशक रहेका दीपेन्द्र लामासँगै फिल्मको रमाइलो कथावस्तुलाई मान्न सकिन्छ ।

‘के घर के डेरा’ चल्नुमा दयाहाङ राई र विपिन कार्कीजस्ता कलाकारको अभिनयसँगै निर्देशक दीपेन्द्र के खनालको भूमिका महत्त्वपूर्ण मान्न सकिन्छ । 

‘महापुरुष’ चल्नुमा फिल्मको कन्टेन्टसँगै निर्देशक प्रदीप भट्टराई र अभिनेताद्वय हरिवंश आचार्य र मदनकृष्ण श्रेष्ठको योगदान उल्लेखनीय मान्न सकिन्छ । 

मौलिक भनिएका फिल्मको निराशाजनक व्यापार

वर्ष २०७९ मा केही आशा गरिएका र मौलिक फिल्मले अपेक्षित दर्शक तान्न सकेनन् । जसमध्ये स्वस्तिमा खड्का अभिनित ‘चिसो मान्छे’, खगेन्द्र लामिछानेको ‘पानीफोटो’, प्रदीप खड्का स्टारर ‘प्रकाश’ इत्यादिलाई लिन सकिन्छ । यी दुवै फिल्मले राम्रो हाइप बनाएका थिए ।