राष्ट्रिय स्वतन्त्र पार्टी (रास्वपा)का नेता रमेश प्रसाईंले वैशाख १० गते हुने उपनिर्वाचनको मौन अवधिमा चलखेल हुन सक्ने भन्दै खबरदारी गरेका छन् । 

बिहीवार चितवनको भरतपुरमा आयोजित चुनावी सभालाई सम्बोधन गर्दै प्रसाईंले उपनिर्वाचन हुने तीनवटै निर्वाचन क्षेत्रमा रास्वपाले जित्ने दाबी गरेका हुन् । चुनाव प्रभावित गर्न ठूला दलले पैसा र भोजभतेर गर्ने खतरा रहेको उनले दाबी गरे । 

‘वैशाख १० गते पैसा बाढ्छन् भने समात्नुस, गोजीमा हाल्दिनुस् । तपाईं हाम्रो घर लुटेर जम्मा गरेको पैसा हो । मासुभात खुवाउछन् भने खाइदिनस् । मतदान केन्द्रमा पुगेर ड्याम ड्याम घण्टीमा भोट हाल्नुस्’ प्रसाईंले भने । 

प्रसाईंले आफ्ना उम्मेदवारसँग ठूला दल तर्सेको दाबी उनले गरे । ‘वैशाख १० गते आइतवार हो, आइतवारलाई हिन्दीमा रविबार भन्छन्’ प्रसाईंले भने । 

नागरिकता प्रकरणमा दोषी देखिएपछि रवि लामिछानेको सांसद पद गएको थियो । तर फेरि लामिछाने उपनिर्वाचनमा यही क्षेत्रबाट उठेका छन् । रविविरुद्धमा कांग्रेसका जीतनारायण श्रेष्ठ र एमालेका रामप्रसाद न्यौपाने चुनावी प्रतिस्पर्धामा उत्रिएका छन् ।