तीन क्षेत्रमा आइतबार सम्पन्न उपनिर्वाचनको मतगणना राति अबेरसम्म सुरु हुन सकेको छैन । बारा–२ र तनहुँ–१ मा मतपेटिका संकलनको क्रममै रहेका कारण मतगणना सुरु हुन ढिलाइ भएको हो । 

यस्तै चितवन–२ मा मतपेटिका संकलन भएपनि कांग्रेसले राष्ट्रिय स्वतन्त्र पार्टीका सभापति तथा सोही क्षेत्रका उम्मेदवार रवि लामिछानेविरुद्धको उजुरीको टुंगो नलागेसम्म मतगणना हुन नसक्ने अडान लिएको छ । 
लामिछानेले आचारसंहिता विपरीतको गतिविधि गरेको भन्दै कांग्रेसले मुख्य निर्वाचन अधिकृतको कार्यालयमा उजुरी दिएको छ । उक्त उजुरीको टुंगो नलागेसम्म मतगणना हुन नसक्ने कांग्रेसको अडान छ । 

कांग्रेसले आफ्नो माग पुरा नभएसम्म मतगणना हुन नसक्ने भनेपछि आइतबार राति नै बोलाइएको सर्वदलीय बैठक समेत बिथोलिएको छ । 

बारा निर्वाचन क्षेत्र नं २, चितवन निर्वाचन क्षेत्र नं २ र तनहुँ निर्वाचन क्षेत्र नं १ को प्रतिनिधिसभा सदस्यको उपनिर्वाचन शान्तिपूर्ण र उत्साहजनकरूपमा सम्पन्न भएको निर्वाचन आयोगले जनाएको छ । 

आयोगका अनुसार तीन क्षेत्रमा गरी समग्रमा करीब ६० प्रतिशत मतदान भएको देखिएको छ । जसअनुसार बारामा ६४ प्रतिशत, चितवनमा ६३ प्रतिशत र तनहुँमा ५३ प्रतिशत मतदान भएकोे छ ।

गत मङ्सिर ४ गते सम्पन्न प्रतिनिधिसभा सदस्य निर्वाचनमा बारा २ मा ६३ दशमलव ५६ प्रतिशत, चितवन २ मा ६७ दशमलव ६३ प्रतिशत र तनमा ५४ दशमलव ०३ प्रतिशत मतदान भएको थियो । यस निर्वाचनमा तीन वटै निर्वाचन क्षेत्रमा तीन लाख ५३ हजार २४७ मतदाता रहेका थिए ।