नेकपा (एमाले)का सांसद रघुजी पन्तले संसद्‍मा प्रधानमन्त्री पुष्पकमल दाहाल 'प्रचण्ड'को दर्शन पाउन पनि दूर्लभ भएको टिप्पणी गरेका छन् । मंगलबार प्रतिनिधिसभा बैठकको विशेष समयमा बोल्दै सांसद पन्तले संसद्‍मा प्रधानमन्त्री प्रचण्डको अनुहार हेर्न पनि दूर्लभ भएको बताएका हुन् ।

उनले भारत भ्रमणबारे संसद्‍लाई अझै जानकारी नगराएको भन्दै प्रधानमन्त्रीको आलोचनासमेत गरे । ‘प्रधानमन्त्रीको त अनुहार हेर्न, दर्शन पाउन पनि दुर्लभ भइसक्यो,' उनले भने, ‘प्रधानमन्त्रीको भारत भ्रमणबारे प्रधानमन्त्रीले एक शब्द भन्नुभएको छैन । यो महत्वपूर्ण विषयमा संसद्‍‌भित्र छलफल होस् ।’

सांसदहरूले पटकपटक आग्रह गर्दा पनि प्रधानमन्त्रीले संसद्‍मा एक शब्द पनि नबोलेको भन्दै उनले असन्तुष्टि जनाए ।