संघीय संसद्को चालू अधिवेशन शुक्रवार राति १२ बजेदेखि अन्त्य भएको छ ।

प्रतिनिधि सभाको शुक्रवारको बैठकमा सभामुख देवराज घिमिरेले कार्यबाहक राष्ट्रपति रामसहायप्रसाद यादवबाट अधिवेशन अन्त्यसम्बन्धी प्राप्त पत्रको व्यहोरा जानकारी गराएका थिए ।

कार्यबाहक राष्ट्रपति यादवले मन्त्रिपरिषद् बैठकको निर्णयको सिफारिसमा संसद् अधिवेशन अन्त्य गरेका हुन् ।

बैठकमा यसअघि सभामुख घिमिरेले अधिवेशनमा प्रतिनिधिसभा बैठकबाट भएका कामकारबाहीको विवरण सुनाएका थिए ।

प्रतिनिधि सभाको शुक्रवार बसेको पहिलो बैठक गृह मन्त्रालयको फरार अभियुक्तको सूचीमा रहेका सांसद लक्ष्मी महतो कोइरीको विषयलाई लिएर अवरुद्ध भएको थियो । ढिलागरी बसेको अर्काे बैठकमा सभामुख देवराज घिमिरेले सांसद कोइरीका विषयमा सदनमा विभिन्न विषय उठेकाले उनको बारेमा संसद्को आगामी अधिवेशनबाट कानून बमोजिम हुने जानकारी गराएका थिए ।

बैठकले सांसदहरू मनोरमा शेरचन, विनाकुमार थनेत, चन्द्रकान्त भण्डारी र वर्षमान पुनको बिदा सभाबाट स्वीकृत गरेको छ ।