सरकारले बजेट तयारीको मुखैमा अर्थसचिव सरुवा गरेको छ ।

बुधवार बसेको मन्त्रिपरिषद् बैठकले प्रधानमन्त्री तथा मन्त्रिपरिषद् कार्यालयका सचिव अर्जुन पोखरेललाई अर्थसचिवमा सरुवा गरेको छ ।

अर्थसचिव तोयम रायलाई उपराष्ट्रपति कार्यालयमा सरुवा गरिएको छ ।

अर्थमन्त्री डा. प्रकाशशरण महतको दबाबमा बजेट तयारी गर्दैगर्दा र बजेट अधिवेशन आह्वान भएकै दिन अर्थसचिव सरुवा भएका छन् । अर्थमन्त्री महतले अर्थतन्त्र सुधारमा चासो दिएर काम गर्नेभन्दा पनि आफू अनुकूल व्यक्तिलाई जिम्मेवारी दिनमै रुचि देखाएका छन् । 

रायलाई तत्कालीन अर्थमन्त्री विष्णु पौडेलले अर्थसचिवको जिम्मेवारी दिएका थिए । अर्थमन्त्रीमा डा. प्रकाशशरण महत आएसँगै अर्थसचिव कसलाई ल्याउने भन्ने बहसमै भए पनि बजेट ल्याउन २५ दिन मात्रै बाँकी हुँदा अर्थसचिव सरुवा गरेका छन् ।

पोखरेल लेखा समूहका अधिकृत हुन् । सहसचिव हुँदा पोखरेलले अर्थ मन्त्रालय अन्तर्गत आन्तरिक राजस्व विभाग र भन्सार विभागमा काम गरेको अनुभव छ ।

उनले कपिलवस्तु र रुपन्देहीको प्रमुख जिल्ला अधिकारी (सीडीओ) भएर पनि काम गरेका छन् । 

पोखरेलले यसअघि मधेश प्रदेशको प्रमुख सचिव भएर काम गरेका थिए भने उनले उद्योग सचिव र संघीय मामिला तथा सामान्य प्रशासन मन्त्रालयको सचिव भएर पनि काम गरेको र अर्थसचिवको जिम्मेवारी पूरा गर्नसक्ने भएकैले बजेट तयारीकै बेला ल्याउनुपरेको अर्थ मन्त्रालय स्रोतले बताएको छ ।