नेपाली नागरिकलाई नक्कली भुटानी शरणार्थी बनाएर अमेरिका लैजाने धन्दामा नयाँ–नयाँ तथ्यहरू खुलासा भएका छन् ।

पछिल्लो समय पूर्व गृहमन्त्री बालकृष्ण खाण, कांग्रेस नेत्री एवं सांसद आरजू राणा तथा मञ्जु खाण पनि तानिएका छन् ।

पक्राउ परेका गिरोहका सदस्यहरूको बयान तथा आरजू र मञ्जुलाई पैसा दिएको भनी दाबी गरिएको अडियो सार्वजनिक भएपछि उनीहरूको संलग्नताको विषय चर्चामा आएको हो ।

सामाजिक सञ्जाल र सञ्चारमाध्यममा आएका अडियोका सम्बन्धमा सत्य तथ्य अनुसन्धान गरिरहेको प्रहरीले जनाएको छ ।

तर, बुधवार पक्राउ पुर्जी जारी भएर फरार रहेका पूर्व उपप्रधानमन्त्री एवं एमाले सचिव टोपबहादुर रायमाझीलाई प्रहरीले अझै पक्राउ गर्न सकेको छैन । टोपबहादुर पक्राउ नपर्दै अन्य हाई–प्रोफाइलहरू समेत तानिएपछि यो विषयमा चर्चा र चासो बढेको छ ।

आईजीपी वसन्त कुँवरलाई फोन गरेर ‘म आउँदै छु’ भनेको भनी दाबी गरेका टोपबहादुर अहिलेसम्म प्रहरीको सम्पर्कमा आएका छैनन् ।

प्रहरीले भैरहवाबाट टोपबहादुरका छोरा सन्दीपलाई पक्राउ गरेर म्याद थप गरी अनुसन्धान गरिरहेको छ । 

अर्घाखाँचीको महेन्द्र विद्योदय माध्यमिक विद्यालयको हिरक जयन्ती समारोहमा सभामुख देवराज घिमिरेसँगै देखिएका टोपबहादुर काठमाडौं जाँदैछु भनेर त्यहाँबाट बाहिरिएका थिए ।

‘काठमाडौं परिसरलाई उहाँले जानकारी गराउनुभएको छैन । उहाँ सांसद हो, कानून बनाउने व्यक्तिले कानूनका कुरा बुझ्नुपर्ने हो,’ काठमाडौं उपत्यका अपराध अनुसन्धान कार्यालयका प्रमुख एसएसपी डा. मनोज केसीले भने ।

अर्घाखाँचीबाट भैरहवा हुँदै काठमाडौं आउन लागेको भनेर प्रहरी पनि ढुक्क साथ बसेको थियो । तर, चालक मात्र काठमाडौं आएको पाइएको प्रहरी अधिकारीहरू बताउँछन् ।

‘हामीले खोजी गरिरहेका छौं । उहाँ (टोपबहादुर रायमाझी)को फोन १९ बेलुकादेखि नै अफ छ,’ काठमाडौं प्रहरी परिसरका प्रमुख एसएसपी दानबहादुर कार्कीले भने ।

प्रहरीका अर्का एक अधिकारी रायमाझी भैरहवामै लुकेर बसेको दाबी गर्छन् । ‘१९ गते काठमाडौं आए भन्ने सूचना थियो, तर उनी आएनन्, अहिले पनि उनी भैरहवामा हुन सक्छन् भन्नेछ तर यकिन कहाँ छन् भन्ने पत्ता लगाउन नसकेकाले पक्राउ गर्न सकेका छैनौं,’ अनुसन्धानमा खटिएका एक प्रहरी अधिकारीले लोकान्तरलाई बताए । 

सांसद रायमाझीले पुरानो फोन अफ गरेर नयाँ फोन प्रयोग गरेकाले को–कोसँग सम्पर्क गरेका छन् भन्ने विषयमा पत्ता लगाउन प्रहरीलाई हम्मे–हम्मे छ । 

नेकपा एमालेका अध्यक्ष केपी शर्मा ओलीले सांसद समेत रहेका रायमाझीविरुद्ध पक्राउ पुर्जी जारी गर्नु शंकास्पद गरेको अभिव्यक्ति दिएका थिए । ‘तानिएको हो कि तनाइएको हो भन्ने विषयमा हामीले अध्ययन गर्दैछौं त्यसपछि मात्रै हामी निष्कर्षमा पुग्छौं,’ पूर्व प्रधानमन्त्री समेत रहेका ओलीले भनेका थिए ।

‘निर्दोष पर्नुहुँदैन, दोषी उम्कनु हुँदैन, दोषी उम्काउने हाम्रो प्रयास होइन तर निर्दोष फसाउन खोजियो भने हामी छाड्दैनौं,’ ओली भनेका थिए । 

गिरोहका नाइकेहरू केशव दुलाल, सानु भण्डारी, सागर थुलुङ राई, टंक गुरुङ, सन्देश शर्मा पोखरेल, टेकनारायण पाण्डे र सन्दीप रायमाझी प्रहरीको हिरासतमा छन् । 

प्रहरीका अनुसार अहिलेसम्म १५४ जनाबाट २० वटा जाहेरी परेको छ । एक जनाबाट ४५ लाखसम्म ठगी गरेको पाइएको प्रहरीले जनाएको छ ।

अपराध अनुसन्धान कार्यालयका एसएसपी केसीका अनुसार अहिलेसम्म २३ करोड रुपैयाँ ठगिएको भन्दै जाहेरी आएको छ । अन्य जाहेरी पनि थपिन सक्ने भएकाले यो रकम बढ्न सक्ने देखिन्छ ।

‘अहिलेसम्मका जाहेरी र प्रमाणका आधारमा २३ करोडभन्दा धेरै कारोबार भएको देखिएको छ,’ डा. केसीले भने, ‘हाम्रो अनुमान ३४ करोडभन्दा धेरै कारोबार भएको भन्ने छ ।’