नेकपा एमालेका महासचिव शंकर पोखरेलले नेकपा माओवादीको लडाकु शिविरभित्र खुलेआम लुट र डकैती भएको आरोप लगाएका छन् ।

शुक्रवार बिहान सामाजिक सञ्जाल फेसबूकमा लेख्दै महासचिव पोखरेलले नेपाली जनताले शान्तिका नाममा ती सबै कुरालाई आजसम्म सहँदै आएको बताएका छन् ।

उनले लेखेका छन्, ‘लडाकु शिविरको खुला सत्य ! लडाकु शिविर प्रकरणमा ७–८ हजारको हाराहारीमा रहेका लडाकुहरूलाई ३२–३३ हजार पुर्‍याएको कुरा प्रचण्ड आफैंले हुंकारका साथ बोलेको अडियो सामाजिक सञ्जालमा सुरक्षित छ । वास्तविक लडाकु ७–८ हजारमध्ये केहीलाई शिविरमा राखेर अरु बाँकीलाई वाइसीएलका रूपमा राजनीतिक रूपमा परिचालित गरेको तथ्य अहिले माओवादीबाट बाहिरिएका धेरैले बोल्ने गर्दछन् । शिविरमा रहेकाहरूले बुझ्ने गरेको भत्ताको चेक उनीहरूका कमाण्डरले खोसेर राख्ने गरेको कुरा त्यहाँ बस्ने लडाकुहरू धेरैले धेरैपटक उठाउँदै आएको कुरा हो । अनमिनले प्रमाणीकरण गरेकाहरूमध्ये धेरैजसो समायोजनमा नगएर स्वेच्छिक अवकाश रोजेर राज्यबाट ठूलो रकम प्राप्त गरेकै हुन् । यी सबै तथ्यहरूबाट राज्यले कति अनुचित आर्थिक भार बोक्नुपर्‍यो र लडाकुको नाममा राज्यले उपलब्ध गराएको सहयोग कसरी उनीहरूका कमाण्डरहरूले लुटे र कसकसलाई बुझाए भन्ने कुरा खोजी गर्दा लुक्न सक्ने कुरा होइन । तर पनि प्रचण्डजीहरू अझै पनि ठूलो स्वरमा हुँकार दिई नै रहेका छन् – लडाकु शिविरमा कुनै भ्रष्टाचार भएको छैन, अनियमितता भएको छैन । हो नि ! लुकेर गरेको भए पो भ्रष्टाचार र अनियमितता हुन्थ्यो । त्यो राज्य माथिको खुलेआम लुट थियो, डकैती थियो । अनि माओवादीका सुप्रिमोहरूलाई लागिरहेको पनि होला खुलेआम लुट र डकैतीलाई भ्रष्टाचार भन्न मिल्छ र ?  तर पनि नेपाली जनताले शान्तिका नाममा ती सबै कुरालाई आजसम्म सहँदै आएका छन् । सत्य यही हो ।’

बिहीवार प्रतिनिधिसभा बैठकमा भएको प्रश्नोत्तरमा सहभागी हुँदै प्रधानमन्त्री पुष्पकमल दाहाल ‘प्रचण्ड’ले शिविरमा कुनै भ्रष्टाचार नभएको र त्यसमा आफू दोषी भए जेल जान तयार रहेको बताएका थिए ।