पोखरा महानगरपालिका खेलकुद विकास समितिको आयोजनामा जारी वडास्तरीय फूटबल प्रतियोगिताको सेमिफाइनलका खेल आजदेखि हुनेछन् ।

मंगलवार सम्पन्न खेलमा पोखरा–१५, पोखरा–३०, पोखरा–१४ र पोखरा–२७ वडाको टोली विजयी हुँदै सेमिफाइनल प्रवेश गरेका छन् ।

खेलकुद विकास समितिका सदस्यसचिव सुवास खड्काका अनुसार वडा नम्बर १५ ले वडा नम्बर १३ लाई ४–१, वडा नम्बर ३० ले वडा नम्बर ८ लाई ३–२, वडा नम्बर १४ ले वडा नम्बर ३२ लाई २–० तथा वडा नम्बर २७ ले वडा नम्बर २४ लाई ४–३ गोलअन्तरले पराजित गरेका थिए । 

बुधवार पहिलो सेमिफाइनल खेल वडा नम्बर १५ र ३० बीच तथा दोस्रो सेमिफाइनल खेल वडा नम्बर १४ र २७ बीच पोखरा रंगशालास्थित फूटबल मैदानमा हुने छ ।

कास्की जिल्ला फूटबल संघको प्राविधिक सहयोगमा भइरहेको प्रतियोगितामा पोखरा महानगरपालिकाका ३३ मध्ये ३० वडाको सहभागिता छ । 

विजेताले १ लाख ५० तथा उपविजेताले १ लाखसहित ट्रफी, मेडल र प्रमाणपत्र पुरस्कार पाउने सदस्यसचिव खड्काले जानकारी दिए । सर्वोत्कृष्ट खेलाडीलाई १५ हजार तथा उत्कृष्ट डिफेन्डर, उत्कृष्ट गोलरक्षक, उत्कृष्ट मिडफिल्डर, उत्कृष्ट फरवार्ड, उत्कृष्ट प्रशिक्षकलाई जनही ५ हजारसहित ट्रफी र प्रमाणपत्र प्रदान गरिनेछ । 

फाइनल खेल बिहीवार पोखरा रंगशालास्थित फूटबल मैदानमा हुने आयोजकले जनाएको छ ।