नेपाल राष्ट्र बैंकका गभर्नर महाप्रसाद अधिकारीले बजेटले लिएको आर्थिक वृद्धिको लक्ष्यलाई परिपूर्ति गर्नेगरी मौद्रिक नीति ल्याउने तयारी गरिरहेको बताएका छन् । 

सोमवार काठमाडौंमा आर्थिक मिडिया सोसाइटीले आयोजना गरेको ‘पोस्ट बजेट– अ होलिस्टिक डिस्क्लोजर’ विषयक अन्तरक्रिया कार्यक्रममा बोल्दै गभर्नर अधिकारीले यस्तो बताएका हुन् । 

उनले राष्ट्र बैंकले ल्याउने मौद्रिक नीति सरकारले ६ प्रतिशतको आर्थिक वृद्धिलाई परिपूर्ति गर्नेगरी आउने बताए । उनले आगामी आर्थिक वर्ष २०८०/८१ को मौद्रिक नीति आगामी साउनको १५ गतेभित्रै जारी गर्ने तयारी रहेको बताए । 

अधिकारीले मौद्रिक नीति ल्याउँदा अर्थतन्त्रको आवश्यकता, मौद्रिक विस्तार र निजी क्षेत्रमा जानुपर्ने कर्जाका विषयलाई ख्याल गरेर तय गर्ने बताए । 
उनले भने,‘सरकारले ल्याएको बजेटले जुन खालको लक्ष्य लिएको छ । ६ प्रतिशतको आर्थिक वृद्धि गर्ने र राष्ट्र बैंकले ६.५ प्रतिशत राखेर आफ्नो मौद्रिक व्यवस्थापन गर्ने आकांक्षा राखेको छ । व्यवहारिक किसिमको लक्ष्यहरु राखेको छ । सरकारले गत वर्ष ८ प्रतिशत आर्थिक वृद्धि राखे पनि यो वर्ष ६ प्रतिशत मात्रै राखिएको छ । ७.५ प्रतिशतको मूल्यवृद्धिसँग तुलना गर्दा ६ प्रतिशत आर्थिक वृद्धि लक्ष्य राख्नु चुनौतिपूर्ण होला । तर अरु विभिन्न आधारहरु छन् । मूल्यवृद्धि माथि जाँदैनकी भन्ने कुरा आइरहेको छ । बजेटमा जुन आर्थिक वृद्धि र मूल्य वृद्धिको लक्ष्य छ । त्यसलाई परिपूर्ति गर्नेगरी राष्ट्र बैंकले आफ्नो मौद्रिक नीतिको तयारी गरिहेको छ ।आगामी आर्थिक वर्ष २०८०÷८१ को मौद्रिक नीति आगामी साउनको १५ गतेभित्रै जारी गर्छौं । मौद्रिक नीति ल्याउँदा अर्थतन्त्रको आवश्यकता के हो ।मौद्रिक बिस्तार कति हुनुपर्ने हो । निजी क्षेत्रमा जानु पर्ने कर्जाका विषयलाई खाल गरेर मौद्रिक नीति तय हुनेछ । मौद्रिक नीतिको लागि आजदेखि नै रायसुझावहरु माग्न थालेका छौं ।’

गभर्नर अधिकारीले यो वर्ष राजश्वमा परेको दबाब न्युनिकरण गर्न धेरै काम भएको बताए ।