भारत भ्रमणको क्रममा प्रधानमन्त्री पुष्पकमल दाहाल ‘प्रचण्ड’ ले उज्जैनमा महाकालेश्वर मन्दिरमा पूजापाठ गरे । उनले  गेरुवस्त्र लगाएर पूजापाठ गरेको विषयमा चर्को टिकाटिप्पणी भयो । 
कम्युनिस्ट प्रधानमन्त्री त्यसमा पनि धर्मनिरपेक्षताका पक्षधर प्रचण्ड धार्मिक अवतारमा भारतमा प्रकट भएको भन्दै टिप्पणी भएको थियो । 

योबारे टिकाटिप्पणी साम्य नहुँदै आज प्रचण्ड पशुपतिनाथ मन्दिरको दर्शन गर्न पुगेका छन् । 

सो क्रममा उनले भारत भ्रमणका क्रममा उज्जैनस्थित ज्योतिर्लिङ्ग महाकालेश्वरबाट ल्याएको जल पशुपतिनाथमा चढाएको बताइएको छ  । उनलाई पशुपतिमा संस्कृतिमन्त्री सुुदन किराती र पशुपति क्षेत्र विकास कोषका सदस्य सचिव डा मिलनकुमार थापाले स्वागत गरेका थिए । 
    
पशुपतिनाथ मन्दिर दर्शनका लागि प्रधानमन्त्री दाहालसँगै भारत भ्रमणको समूहमा रहेका अर्थमन्त्री डा प्रकाशशरण महत, परराष्ट्रमन्त्री एनपी साउद, उद्योग, वाणिज्य तथा आपूर्तिमन्त्री रमेश रिजाल तथा ऊर्जा, जलस्रोत तथा सिँचाइमन्त्री शक्तिबहादुर बस्नेत पनि पुगेका थिए ।