कोशी प्रदेश सरकार र प्रदेश १ पुनः नामकरण संयुक्त संघर्ष समितिबीच आज वार्ता हुँदैछ ।

बिहान ८ बजे विराटनगरको बिग होटलमा वार्ता गर्ने सहमति भएको आन्दोलनरत प्रदेश १ पुनः नामकरण संयुक्त संघर्ष समितिका नेता प्रेम ऐकतेनले बताए ।

संघर्ष समितिको विराटनगरमा २ दिनसम्म चलेको बैठकले वार्ता गर्ने निर्णय गरेको थियो । 

सरकारले वार्ताका लागि पत्राचार गरेको १ हप्तापछि आन्दोलनरत पक्षले पनि आइतवार वार्ताका लागि समिति बनाएको छ । 

आन्दोलनरत पक्षले बनाएको समितिमा कोशीकै पक्षमा हस्ताक्षर गर्ने माओवादी केन्द्रका नेता समेत छन् । आफ्ना नेता तथा कार्यकर्ताले पार्टी छाड्ने चेतावनी दिएपछि माओवादीले कोशीको पक्षमा हस्ताक्षर गर्नु गल्ती भएको भन्दै माफी मागेर पुनः नामकरण हुनुपर्ने बताउँदै आएको छ ।

आन्दोलनरत पक्षको तर्फबाट गोविन्द आङ्बुङ, युवराज राई, रामभक्त कुरुम्बाङ, लाक्पा शेर्पा, गेल्जे शेर्पा, कुमार लिङ्देन, रमेश राई, कृष्ण चोङ्बाङ, प्रेम मिभक र पदम जवेगू वार्तामा जानेछन् । 

पुनः नामकरणका विषयमा छलफल समेत गर्न नसकिने अडान राख्दै आएका मुख्यमन्त्री हिक्मत कार्कीले आफू अल्पमतमा परेपछि वार्ता समिति बनाएका थिए ।

खानेपानी मन्त्री तिलकुमार मेयाङ्बोको संयोजकत्वमा उद्योग, कृषि तथा सहकारी मन्त्री भक्तिप्रसाद सिटौला र सामाजिक विकासमन्त्री बुद्धिकुमार राजभण्डारी सदस्य रहेको समिति बनाएर सरकारले वार्ता आह्वान गरेको थियो ।

फागुन १७ गते प्रदेश सभाले प्रदेशको नाम ‘कोशी’ राखेपछि नामकरणविरुद्ध आन्दोलन शुरू भएको थियो । आन्दोलनका क्रममा पदम लिम्बू लाजेहाङको मृत्यु भएको थियो ।