सभामुख देवराज घिमिरेले लोप हुन लागेका राष्ट्रिय संस्कार र संस्कृतिको विकास गर्नु आजको आवश्यकता भएको बताएका छन् ।

मंगलवार नाचघरमा आयोजित राष्ट्रिय नाचघर सांस्कृतिक संस्थानको ५१औं वार्षिकोत्सवलाई सम्बोधन गर्दै उनले यस्तो बताए । उनले आज संस्कृतिको क्षेत्रमा ठूला चुनौतीहरू रहेका र त्यसलाई संस्थानले महत्त्वपूर्ण रूपमा लिँदै अघि बढ्नुपर्ने बताए ।

उनले अनुशासनमा बाँधिएको संस्कृति विकास गर्ने, ठूलालाई कदर र सानालाई माया गर्ने संस्कृतिको विकास गर्न जरुरी रहेको बताए । उनले विभिन्न धर्म, संस्कार र संस्कृतिका परम्पराहरू विभिन्न खालका कलाहरूमा साहित्य, संगीत, नाट्यमा अभिव्यक्त हुनु राम्रो पक्ष भएको बताए ।

उनले भने, ‘यसका अघि ठूला चुनौतीहरू छन् । ती चुनौती भनेकै लोप हुन लागिरहेका राष्ट्रिय संस्कार र संस्कृतिको विकास गर्ने, हामीले अनुशासनमा बाँधिएको संस्कृति विकास गर्ने, ठूलालाई कदर र सानालाई माया गर्ने संस्कृतिको विकास गर्ने, यो सन्दर्भमा विभिन्न धर्म, संस्कार र संस्कृतिका परम्पराहरु विभिन्न खालका कलाहरुमा साहित्य, संगीत, नाट्यमा अभिव्यक्त हुँदै आइरहेको छ ।’

सभामुख घिमिरेले पुराना र लोपोन्मुख कला र संस्कृतिको जगेर्ना गर्न राष्ट्रिय नाचघरले महत्त्वपूर्ण भूमिका खेलेको भन्दै प्रशंसा गरेका छन् ।