नेकपा एमालेका अध्यक्ष तथा पूर्व प्रधानमन्त्री केपी शर्मा ओलीले विश्वका प्रदूषित शहरको सूचीको पहिलो नम्बरमा काठमाडौंको नाम हुनु चिन्ताको विषय भएको बताएका छन् ।

मंगलवार बिहान सामाजिक सञ्जाल फेसबूकमा लेख्दै अध्यक्ष ओलीले सबै मिलेर प्रदूषणविरुद्ध कदम चाल्नुपर्ने बताए ।

उनले प्रदूषणबाट बच्न घरबाहिर निस्किँदा मास्क अनिवार्य लगाउन समेत आग्रह गरेका छन् ।

उनले लेखेका छन्, ‘हिजो ट्वीटर स्क्रोल गर्दै जाँदा ‘वर्ल्ड अफ स्टाटस’ भन्ने ट्वीटर ह्यान्डलबाट आएको एउटा ट्वीटमा आँखा अडिए । त्यसमा विश्वका प्रदूषित शहरको सूचीको पहिलो नम्बरमा हाम्रो काठमाडौंको नाम थियो । ५० लाखभन्दा बढी मानिस बस्ने यस शहरका लागि स्वास्थ्यको दृष्टिकोणबाट यो चिन्ताको विषय हो तर यस विषयमा चिन्ताभन्दा बढी चिन्तन गर्नु आवश्यक छ । काठमाडौं महानगर पालिकाका प्रमुख, उपप्रमुखले पनि काठमाडौंलाई यसबाट बचाउन पक्कै केही गर्दै हुनुहुन्छ । यसमा प्रदेश र संघ सरकारहरूको पनि भूमिका आवश्यक छ । यसका लागि हामी सबै मिली यो वा त्यो नभनी तत्काल कदम चालौं । हामी सबैले घरभित्र वा बाहिर वातावरणलाई जीवन्त राख्न आ–आफ्नो ठाउँबाट जस्तो सकिन्छ, त्यस्तो भूमिका खेलौं । प्रदूषणबाट बच्न घरबाहिर निस्किँदा मास्क अनिवार्य लगाऔं ।’