सशस्त्र प्रहरी बल नेपालले हुनसक्ने सम्भावित मनसुनजन्य क्षति न्युनीकरण र उद्धारका लागि जनशक्ति तथा उपकरण ‘अलर्ट’ राखेको छ ।

जसअन्तर्गत डोजर, लोडर गरी १३ वटा हेभी इक्युपमेन्टलाई प्रधान कार्यालयसहित कोशीको नम्बर १ बराह बाहिनी सुनसरी, कर्णालीको नम्बर ६ महेश्वरी बाहिनी सुर्खेत, सुदूरपश्चिमको नम्बर ७ वैद्यनाथ बाहिनी कैलाली, विपद् व्यवस्थापन तालिम शिक्षालय कुरिनटार, बागमतीको नम्बर २० विपद् उद्धार उपत्यका गण काठमाडौं र गण्डकीको नम्बर २४ कालिका गण कास्कीमा तयारी हालतमा राखिएको सशस्त्र प्रहरी बलका सहप्रवक्ता सशस्त्र प्रहरी नायब उपरीक्षक (डीएसपी) शैलेन्द्र थापाले बताए ।

कोशी प्रदेशको सुनसरीदेखि सुदूरपश्चिम प्रदेशको दार्चुलासम्म गरी ३१ जिल्लाका ४४ वटा सशस्त्र प्रहरी बल नेपालका युनिटहरूमा १०७ वटा मोटरबोट र र्‍याफ्टबोट तथा १४ जिल्लाका १७ वटा सशस्त्र प्रहरी बल नेपालका युनिटहरूमा ३३ वटा डिजास्टर रिलिफ सिस्टम (डीआरएस) कन्टेनरहरू समेत तयारी हालतमा राखिएको छ ।

८ वटा विपद् सामूहिक उद्धार एम्बुलेन्स तथा जनशक्ति नम्बर १ बराह बाहिनी सुनसरी, नम्बर २ छिन्नमस्ता बाहिनी महोत्तरी, नम्बर ४ मुक्तिनाथ बाहिनी कास्की, नम्बर ५ विन्ध्यावासिनी रुपन्देही, नम्बर ६ महेश्वरी बाहिनी सुर्खेत, नम्बर ७ वैद्यनाथ बाहिनी कैलाली, विपद् व्यवस्थापन तालिम शिक्षालय कुरिनटार र नम्बर २० विपद् उद्धार उपत्यका गण काठमाडौंमा तयारी हालतमा राखिएको छ ।

डीएसपी थापाका अनुसार ए क्लासका ८ वटा एम्बुलेन्स नम्बर १ बराह बाहिनी महोत्तरी, नम्बर २ छिन्नमस्ता बाहिनी महोत्तरी, नम्बर ४ मुक्तिनाथ बाहिनी कास्की, नम्बर ६ महेश्वरी बाहिनी सुर्खेत, नम्बर ७ वैद्यनाथ बाहिनी कैलाली, नेपाल एपीएफ अस्पताल बलम्बु, क्षेत्रीय अस्पताल बाँके र विपद् व्यवस्थापन तालिम शिक्षालय कुरिनटारमा तयारी हालतमा राखिएको छ ।

सशस्त्र प्रहरी बल नेपालले विपद् व्यवस्थापन तालिम प्राप्त गोताखोर आवश्यक उपकरणसहित सातै वटा प्रदेशमा रहेका सशस्त्र प्रहरी बल नेपालका बाहिनी मुख्यालयहरू, विपद् व्यवस्थापन तालिम शिक्षालय कुरिनटार र नम्बर २० विपद् उद्धार उपत्यका गण काठमाडौंमा परिचालित रहेका समेत उनले बताए  ।

सशस्त्र प्रहरी बल नेपालका सातै प्रदेशमा रहेका बाहिनी मुख्यालयहरू, नम्बर ९ पशुपतिनाथ बाहिनी काठमाडौं, विपद् व्यवस्थापन तालिम शिक्षालय कुरिनटार, नम्बर २० विपद् उद्धार उपत्यका गण काठमाडौं, रेस्क्यु टावर फेवाताल कास्की र रेस्क्यु टावर नारायणी नदी किनार चितवन, विपद् व्यवस्थापन बेशहरू मुलघाट धनकुटा, निजगढ बारा, आदमघाट धादिङ, बेनी म्याग्दी, भालुवाङ दाङ, चिप्ले सुर्खेत र अमरगढी डडेलधुरामा सशस्त्र प्रहरी बल नेपालको विपद् व्यवस्थापन टोली आवश्यक उपकरणसहित खटिएको छ । 

मनसुनजन्य क्षति न्यूनिकरण र उद्धारका लागि सशस्त्र प्रहरी बल नेपालले ७ वटै बाहिनी मुख्यालयहरूमा १/१ प्लाटुन आवश्यक सामग्रीसहित तयारी हालतमा राखेको छ । 

बाढीका कारण पानीका स्रोतहरूमा क्षति भएमा तत्काल खानेपानी व्यवस्थापनको लागि उपत्यकामा ७, कास्कीमा २, बर्दघाटमा १, बाँके र कैलालीमा १/१ गरी १२ वटा स्थानमा डिप ट्यूबेलसहित सशस्त्र प्रहरीको टोली तयारी हालतमा रहेको छ । सशस्त्र प्रहरी बल खराब मौसम, अप्ठ्यारो ठाउँ र २४ सै घण्टा उद्धार र राहतमा जुट्न तयार रहेको जनाइएको छ ।

अप्ठ्यारो पर्दा निःशुल्क रूपमा संगठनको हटलाइन नम्बर १११४ मा फोन गर्न तथा आफू नजिकको युनिटमा खबर गर्न सकिने समेत डीएसपी थापाले बताए ।