राष्ट्रपति रामचन्द्र पौडेलले भानु जयन्तीको अवसरमा शुभकामना सन्देश जारी गर्दै नेपालभित्रका सबै जातजाति, भाषभाषी, साहित्य र संस्कृतिको संरक्षण गर्न प्रेरणा मिलोस् भन्ने कामना गरेका छन् ।

नेपाली भाषाका आदिकवि भानुभक्त आचार्य राष्ट्रिय एकताको प्रतीक भएको उनले जनाएका छन् ।

‘भानुभक्तले नेपाली भाषालाई काव्यभाषाका रूपमा समन्नुत तुल्याएका छन् । उनका कविताको प्रसारसँगै नेपालको बहुभाषिक र बहुसांस्कृतिक समाजमा राष्ट्रिय एकताको भावना सुदृढ हुँदै गएको छ,’ सन्देशमा भनिएको छ ।

आदिकवि भानुभक्तले सरल र रोचक ढंगले नेपालीमा लेखेको रामायण सबै नेपालीले सरल ढंगले पढ्न सक्ने हुँदा यसबाट हिमाल, पहाड र तराईका जनताबीच भावनात्मक एकता अभिवृद्धि भएको सन्देशमा उल्लेख छ ।

शुभकामनामा भनिएको छ, ‘भानुभक्तीय रामायण नेपालीलाई एकताको सूत्रमा बाँध्ने एउटा महत्त्वपूर्ण रचना हो । यस रचनाको माध्यमले देशलाई पृथ्वीनारायण शाहले प्रशासनिक रूपले गराएको एकतालाई भावनात्मक एकताको सूत्रमा बाँध्न महत्त्वपूर्ण भूमिका खेलेको छ । त्यसकारण भानुभक्त नेपाली राष्ट्रिय एकताको प्रतीक पनि हुन् ।’

भानु जयन्ती मनाइरहँदा भानुभक्तको जन्मस्थल तनहुँको चुँदीरम्घालाई साहित्यिक तीर्थस्थलको रूपमा विकास गर्न सकेमा उनीप्रति सच्चा श्रद्धाञ्जली हुने पौडेलले जनाएका छन् ।