‘लफडा’ नाममा नयाँ सिरियल ल्याउँदै ‘राजु मास्टर’

हास्य कलाकार राजु पौडेल अर्थात ‘राजु मास्टर’ले नयाँ टेलिसिरियल ‘लफडा’ प्रसारणमा ल्याउने भएका छन् । 

यो टेलिसिरियल भदौको पहिलो हप्ताबाट प्रसारणमा आउने उनले जानकारी दिए । 

सामाजिक सञ्जाल फेसबुकमा ८ मिनेट अवधिको अफिसियल प्रोमो सार्वजनिक गर्दै उनले नेपाल टेलिभिजन र ‘मास्टर टीभी’ युट्युबमा सिरियल प्रसारणमा आउने जानकारी दिएका छन् । केही समयदेखि रोकिएको सिरियल ‘जुठे’ पनि अबदेखि निरन्तर प्रसारणमा आउने जनाएका छन् । 

‘अब भने ‘जुठे’ सङ्गै अर्को नयाँ कमेडी सिरियल ‘लफडा’ पनि आउने भएको छ’ उनले फेसबुकमार्फत जानकारी दिँदै भनेका छन् ‘‘जुठे’ पहिलेकै समय बुधबार नै आउने छ भने ‘लफडा’ भदौको पहिलो हप्तादेखि नेपाल टेलिभजनमा हरेक आइतबार ८ः५० मा र मेरो अफिसियल युट्युब च्यानल ‘मास्टर टीभि’बाट आउँदैछ ।’ 

‘लफडा’मा राजु पौडेल, अनिता बस्नेत, कृष्ण शिवाकोटी, कमला रेग्मी, श्री थापा, मुकुन्द मैनाली, केशव सापकोटा लगायतको अभिनय रहनेछ । सिरियलमा ‘राजु मास्टर’कै लेखन तथा निर्देशन रहनेछ ।