सिद्धार्थ राजमार्गको बुटवल–पाल्पा सडकखण्ड पहिरोका कारण आइतवार रातिदेखि अवरुद्ध भएको छ ।

तिनाउ गाउँपालिका–३ स्थित तिसमाइल भन्ने स्थानमा पहिरो जाँदा राजमार्ग अवरुद्ध भएको दोभान प्रहरी चौकी, पाल्पाका प्रहरी नायव निरीक्षक (सई) कमल थापाले जानकारी दिए ।

‘पहिरो राति १२ बजे खसेको हो । अहिले पनि राजमार्ग पूर्णरूपमा अवरुद्ध भएको छ । बिहान ५ बजे सडक डिभिजन कार्यालय पाल्पाको एउटा जेसीबीले पहिरो पन्छाउने काम गरिरहेको छ,’ थापाले भने । 

पहिरोसँगै रुख ढलेर सडकमा खसेको हुँदा पहिरो पन्छाउन समय लाग्ने उनले बताए । राजमार्ग अवरुद्ध भएपछि सयौंको संख्यामा सवारीसाधन बीच बाटोमा रोकिएका छन् ।